ОАВ: АҚШ авиаташувчи гуруҳини Яқин Шарққа йўналтирди

Уларнинг Яқин Шарққа етиб бориши тахминан бир ҳафта вақт олиши кутилмоқда. NYT маълумотига кўра, у ерга қўшимча қурол-яроғ ва ҳарбий техника ҳам етказилмоқда.

Пентагон ҳозирча авиаташувчи гуруҳининг Яқин Шарққа кўчирилаётганини расман тасдиқлагани йўқ.

Ню-Йоркдаги БМТ Хавфсизлик Кенгаши йиғилишида АҚШ доимий вакили Майк Уолц Эронга нисбатан Трамп “қонли қирғинни тўхтатиш” учун барча вариантларни кўриб чиқaётганини айтиб, ҳарбий кескинлашув эҳтимолини тилга олди. У бу билан Эрон ҳокимиятининг намойишларни қаттиққўллик билан бостиришини назарда тутди. “Президент Трамп — чексиз гап-сўзларни эмас, амалий ишни танлайдиган одам”, — деди Уолц.

Аввалроқ Доналд Трамп Эронда давом этаётган оммавий норозилик намойишларига изоҳ бериб, намойишчиларни давлат муассасаларини эгаллашга ва “қотиллар ҳамда зўравонларнинг исмларини” ёдда сақлаб қолишга чақирган. “Ёрдам аллақачон йўлга чиққан”, — деди Оқ уй раҳбари. Шунингдек, АҚШ президенти Вашингтон Теҳронга нисбатан бир нечта “жуда қаттиқ” ҳаракат вариантларини кўриб чиқaётганини айтган.

Эронда ҳукуматга қарши намойишлар 2025 йил 28 декабрдан бери давом этмоқда. Аввалига мамлакат аҳолиси миллий валюта қадрсизланиши фонидаги молиявий инқирозга қарши чиққан, аммо тез орада иштирокчиларнинг иқтисодий талаблари сиёсий талабларга айланган.

Норозиликлар мамлакатнинг 25 та вилоятидаги 60 дан ортиқ шаҳарни қамраб олган. Энг йирик акциялар Теҳронда, шунингдек, Эроннинг ғарби ва жануби-ғарбидаги Малекшахи, Керманшах, Лордеган шаҳарларида бўлиб ўтган. Ҳокимиятлар чиқишларни бостиришни бошлаган, бироқ содир бўлаётган воқеалар ҳақида ишончли маълумотлар кам — бир неча кундан бери мамлакатда интернет ишламаяпти. Норвегияда жойлашган Iran Human Rights (IHR) ҳуқуқни ҳимоя қилиш ташкилоти маълумотига кўра, намойишлар давомида камида 3428 киши ҳалок бўлган, 10 мингдан ортиқ одам ушланган.