Қўшимча функционаллар
-
Тунги кўриниш
Трамп Зеленский билан учрашувдан кейин: уруш тугаши керак
Швейцариянинг Давос шаҳрида Украина президенти Володимир Зеленский ва АҚШ президенти Доналд Трамп учрашуви бўлиб ўтди. Оқ уйнинг пайшанба куни, 22 январда билдиришича, Жаҳон иқтисодий форуми (ЖИФ) доирасидаги музокаралар тахминан бир соат давом этган.
Фото: REUTERS
Учрашувдан сўнг Трамп журналистларга Зеленский билан учрашув “яхши” ўтганини айтди. У Россия президенти Владимир Путинга қандай хабар йўлламоқчи экани ҳақидаги саволга жавобан, Россиянинг Украинага қарши уруши тугаши кераклигини билдирди. Шунингдек, Трамп ҳар икки томон ҳам тинчликни исташини таъкидлади.
Трамп Давосда бир кун олдинги нутқида Зеленский билан учрашиш режаси борлигини айтган ва Украина президенти келишув тузишга тайёр, деган ишончини билдирган. “Менимча, биз бунга жуда яқин келдик, деб айта оламан”, — деган у. АҚШ президенти деярли тўрт йилдан бери давом этаётган Украинадаги урушни тўхтатиш зарурлигини яна бир бор таъкидлади.
Зеленскийнинг Трамп билан учрашуви АҚШ махсус вакили Стив Уиткофф ва Трампнинг куёви Жаред Кушнернинг Москвада РФ президенти Владимир Путин билан музокаралари олдидан бир неча соат аввал бўлиб ўтган.
Зеленскийнинг ўзи 20 январ куни Россия ҳаво ҳужумлари давом этаётгани сабабли Украинада кўплаб шошилинч ишлар борлигини айтган. Унинг сўзларига кўра, у Швейцарияга фақат имзолаш учун ҳужжат тайёр бўлса ёки, жумладан, ҳаво мудофааси воситаларини етказиб бериш бўйича янги, аниқ ёрдам ваъдалари пайдо бўлган тақдирда боради.
