Германия Трампнинг “Тинчлик кенгаши”да иштирок этишдан бош тортди

Германия АҚШ президенти Доналд Трамп таклиф қилаётган “Тинчлик кенгаши” деб аталувчи тузилмада унинг ҳозирги кўринишида иштирок этмоқчи эмас. Бу ҳақда Германия канцлери Фридрих Мерц жума куни, 23 январда Римда Италия бош вазири Жоржа Мелони билан ўтказилган қўшма матбуот анжуманида билдирди.

Мерцнинг айтишича, у бир неча ҳафта олдин Трампга “Тинчлик кенгаши”га қўшилишга тайёрлигини айтган — агар у, дастлаб режалаштирилганидек, Ғазо секторидаги тинчлик келишувларига риоя этилишини назорат қилувчи орган бўлса. Аммо Трамп ҳозир режалаштираётган шаклдаги бу органга “биз, ҳеч бўлмаса, бошқарув тузилмаларига, жумладан Германиянинг конституциявий ҳуқуқи билан боғлиқ сабаблар туфайли ҳам, рози бўла олмаймиз”, дея тушунтирди ГФР ҳукумати раҳбари.

Шу билан бирга, Фридрих Мерцнинг таъкидлашича, Германия АҚШ билан ҳамкорликнинг янги шаклларини ҳам синаб кўришга тайёр — “агар гап турли ҳудудларда тинчликка яқинлаштирадиган янги форматларни излаш ҳақида борадиган бўлса”, бу фақат Ғазо сектори ва Яқин Шарқдагина эмас, балки Украинада ҳам бўлиши мумкин.

Жоржа Мелони ҳам Трампнинг “Тинчлик кенгаши”га қўшилиш таклифини рад этди ва Мерцнинг сабабларига ўхшаш далилларни келтирди. Унинг сўзларига кўра, бу орган ҳозир қандай тузилган бўлса, унда Италиянинг иштироки ўз конституциясига зид бўлар эди. Мелонининг таъкидлашича, кенгаш низоми ҳам Италиянинг “ҳуқуқий тизимига мос келмайди”, бу ҳақда у Римда АҚШ президентига аллақачон хабар берган.

Италия бош вазири, у кўтарган масалалар ҳал этилса, Рим “Тинчлик кенгаши”да иштирок этиш таклифини қайта кўриб чиқишга тайёр бўлишини билдирди.

Айтилишича, “Тинчлик кенгаши” Ғазо секторида тинчликни тартибга солиш режасини таъминлаш мақсадида тузилган ва ҳатто ўз фаолияти учун БМТ мандатини ҳам олган. Бироқ унинг низоми билан танишган кузатувчилар “Тинчлик кенгаши”нинг ваколатлари анча кенг бўлиб қолиши ва у БМТга рақобатчига айланиб кетиши мумкинлигини қайд этмоқда.

Шу билан бирга, “Тинчлик кенгаши”да қарор қабул қилиш ваколатлари Доналд Трамп қўлида жамланиши белгиланмоқда. Шунингдек, у эҳтимол, кенгаш раиси лавозимини умрбод сақлаб қолиши ҳам мумкин, чунки унинг лавозимдан кетиши фақат шахсий хоҳиши билан ёки ижро қўмитаси аъзоларининг якдил қарори билан амалга ошиши мумкин. Ижро қўмитаси таркибига, бошқалар қаторида, Трампнинг куёви Жаред Кушнер ҳам киради.