1 февралдан айрим ёшларга ҳайдовчилик ўқув курси учун субсидия берилади

2026 йил 1 февралдан бошлаб камбағал оилалар реестрига киритилган оилалардаги ёшларни қўллаб-қувватлаш мақсадида автомототранспорт ҳайдовчиларини тайёрлаш ўқув курслари харажатлари “Ёшлар дафтари” жамғармалари ҳисобидан субсидия қилинади.

Фото: Kun.uz

Амалдаги қонунчиликка мувофиқ, камбағал оилалар реестрига киритилган оилалардаги ёшлар учун янги имтиёз жорий этилмоқда. Унга кўра, 2026 йил 1 февралдан эътиборан “Ёшлар дафтари” жамғармалари орқали автомототранспорт ҳайдовчиларини тайёрлаш бўйича ўқув курслари харажатларини қоплаш учун субсидия ажратилади.

Мазкур субсидия ҳайдовчилик гувоҳномасининг A, B, D ҳамда DE тоифаларини олиш учун тўланади. Бу эса ёшларнинг меҳнат бозорида рақобатбардошлигини ошириш, уларни касб-ҳунарга йўналтириш ва барқарор даромад манбаига эга бўлишига кўмаклашишга қаратилган.

Ушбу қўллаб-қувватлаш чораси, айниқса, ижтимоий ҳимояга муҳтож ёшлар учун муҳим аҳамият касб этади. Чунки ҳайдовчилик гувоҳномасига эга бўлиш транспорт, логистика, хизмат кўрсатиш ва бошқа соҳаларда иш топиш имкониятларини кенгайтиради.

Субсидия ажратиш тартиби, уни олиш шартлари ва ҳужжатлар рўйхати ваколатли органлар томонидан белгиланган тартибда амалга оширилади. Ёшлар тегишли туман ёки шаҳар ҳокимликлари ҳузуридаги “Ёшлар дафтари” билан ишловчи тузилмаларга мурожаат қилиши мумкин.