Чет элда ўзбек ошхонаси ёки ресторанини ташкил этаётган ёки очган ўзбекистонлик тадбиркорлар субсидия олишлари мумкин бўлди.
Қайд этилишича, ушбу хизмат Туризм қўмитаси томонидан my.gov.uz портали орқали бепул кўрсатилади.
Бунда Ўзбекистонда рўйхатдан ўтган тадбиркорлар хорижда миллий ресторан ташкил этиш билан боғлиқ харажатларининг 50 фоизигача бўлган қисмини субсидия кўринишида қайтариб олишлари мумкин.
Субсидия олиш учун мурожаат қилинганида рестораннинг хорижда рўйхатдан ўтгани ва бино ҳуқуқини тасдиқловчи ҳужжатлар, санитария ва ёнғин хавфсизлиги талабларига мувофиқлиги, амалга оширилган харажатлар ва Ўзбекистондан маҳсулот етказиб бериш ҳужжатлари ҳамда рестораннинг ички ва ташқи фотосуратлари лозим бўлади.
my.gov.uz орқали топширилган ариза 18 иш куни ичида кўриб чиқилади ва ижобий қарор қабул қилингач, субсидия 7 иш куни ичида банк ҳисобварағига ўтказиб берилади.
Агар аризада камчиликлар бўлса, уларни тузатиб, қайта топшириш имконияти мавжуд.
