Билл Гейтс The Verge нашрининг Decoder подкастида инсон меҳнатининг келажаги ҳақида ўз қарашларини баён қилди. Унинг айтишича, бугун одамлар бажараётган кўплаб вазифаларни келажакда сунъий интеллект ва роботлар ўз зиммасига олиши мумкин.
Гейтс бу ўзгаришлар тахминан 20 йилдан сўнг юз беришини кутмоқда. Бироқ унинг прогнози муҳим шартга боғлиқ — сунъий интеллектнинг ривожланиши секинлашмаслиги керак.
Унинг баҳолашича, роботлар меҳнати инсонникига нисбатан арзонроқ ва самаралироқ бўлади. Натижада аксарият товарларни ишлаб чиқариш ва хизматларни кўрсатиш учун инсон меҳнатига эҳтиёж қолмаслиги мумкин.
Гейтс бундай ўзгаришлар товарлар нархининг пасайиши, тиббий ёрдам сифатининг яхшиланиши ва тақчилликнинг камайишига олиб келиши мумкинлигини айтган. Аммо бу жараён барча учун бирдек енгил кечмайди. Айниқса, касбий кўникмаларига талаб камаядиган ходимлар жиддий қийинчиликларга дуч келиши мумкин.
Ўзгаришлар дастлаб офис ишлари ва асосан ақлий меҳнатга таянадиган айрим касбларда сезилиши кутилмоқда. Гейтснинг фикрича, бу соҳаларда сунъий интеллектнинг таъсири яқин келажакдаёқ яққол намоён бўлиши мумкин.
Масалан, сунъий интеллект телефон орқали савдо қилиш, мижозларга хизмат кўрсатиш ва бухгалтерия ҳисобини юритиш каби вазифаларни бажара олади. Гейтс технология бу ишларни анча арзон, тез ва аниқ амалга ошириш имконига эга бўлишини кутмоқда.
Унинг фикрича, сунъий интеллект инсондан устун ақлий салоҳиятга эришгач, офис ва ақлий меҳнат билан боғлиқ соҳаларда мутахассислар етишмовчилиги барҳам топади.
Инсон қиёфасидаги роботлар эса жисмоний меҳнат бозорига ҳам шундай таъсир кўрсатиши мумкин. Бу, жумладан, қурилиш ва қишлоқ хўжалигига тааллуқли. Уй қуриш ёки озиқ-овқат етиштириш каби вазифаларнинг роботлар зиммасига ўтиши мазкур соҳалардаги иш ўринларини ўзгартириши мумкин.
Суҳбатда робототехникага инвестициялар, айниқса, Хитойда ортиб бораётганига ҳам эътибор қаратилган. Гейтснинг баҳолашича, бу жисмоний ишларни кам харажат билан бажарадиган машиналарни яратиш имконияти реал эканини кўрсатади.
Шу билан бирга, у автоматлаштиришнинг ижобий имкониятларини ҳам таъкидлаган. Роботлар арзонроқ уй-жой қуриши, сунъий интеллект эса касалликларни даволаш усулларини ишлаб чиқишга ёрдам бериши мумкин. Бундай технологиялар турмуш даражасини ошириш ва асосий хизматларни кўпроқ одамлар учун ҳамёнбоп қилиш салоҳиятига эга.
