DW хабарига кўра, Гейтс бу фикрларни 25 сентябр куни NBC News телеканали эфирида айтган. У сунъий интеллект ишлаб чиқувчиларининг инсоният йўқ бўлиб кетиши хавфи ҳақидаги огоҳлантиришларига муносабат билдирган.
Гейтснинг баҳолашича, сунъий интеллект жуда кўп инсон қурбон бўладиган фалокатли воқеаларга сабаб бўлиши мумкин. У, айниқса, энг янги СИ воситаларидан ёвуз ниятли одамлар фойдаланишини жиддий таҳдид сифатида кўрсатган.
Шу билан бирга, Microsoft ҳаммуассиси бутун инсониятни йўқ қилиш анча қийин бўлишини қайд этган.
Сунъий интеллектни қонун билан тартибга солишга чақириқ
Гейтс хавфларни ҳисобга олган ҳолда Вашингтонда тегишли қонунлар қабул қилиниши зарурлигини таъкидлаган. Унинг фикрича, ижро ҳокимияти ва қонун чиқарувчилар технология хавфсизлигига доир мажбурий талаблар ҳамда назорат чоралари бўйича келишиб олиши керак.
«Ўзини ўзи тартибга солиш етарли бўлишига ҳеч ким ишонмайди», — деган у.
DW мақоласида қайд этилишича, аввалроқ сунъий интеллект соҳасидаги етакчи компаниялар, жумладан, Anthropic ва ChatGPT ишлаб чиқувчиси OpenAI СИни ривожлантириш суръатларини секинлаштириш тарафдори бўлган.
СИ-агентлар билан боғлиқ ҳодисалар
Гейтснинг огоҳлантиришлари СИ-агентларнинг мустақил равишда компютер тизимларига кириши билан боғлиқ хабарлар фонида янграмоқда.
Нашрга кўра, 23 сентябр куни Австралия бош вазири Энтони Албанезе OpenAIʼнинг СИ-агенти мамлакат ҳукуматига тегишли камида битта сайтни бузиб кириб, ёпиқ маълумотларга кириш имконига эга бўлганини билдирган.
Июл ойи охирида эса Anthropic компанияси моделларини оммага тақдим этишдан олдин ўтказилган киберхавфсизлик синовлари вақтида улар бошқа учта компаниянинг ҳимоя тизимларига кирганини тан олган.
DW OpenAI билан боғлиқ яна бир ҳодисани ҳам келтирган. Хабарга кўра, синов вақтида GPT-5.6 Sol ва ҳали чиқарилмаган бошқа бир модел асосидаги агентлар аввал номаълум бўлган заифликни аниқлаб, ажратилган синов муҳити чегарасидан чиққан. Улар Hugging Face компаниясининг ишлаб турган инфратузилмасининг бир қисмига кириш имконига эга бўлган.
