Қўшимча функционаллар
-
Тунги кўриниш
2026 йил: дата-марказлар харитаси — қайси мамлакат етакчи?
Дата-марказлар стриминг хизматлари ва булутли сақлаш тизимларидан тортиб, бутун соҳаларни ўзгартираётган сунъий интеллект (СИ) тизимларигача бўлган барча рақамли хизматларнинг ишлашини таъминлайди. Инфратузилма миқёси бўйича эса бир давлат бошқалардан сезиларли даражада илгарилаб кетган.
Data Center Map маълумотларига асосланган ва мамлакатлар бўйича амал қилаётган объектларни ҳисобга олган сўнгги маълумотларга кўра, АҚШда 3960 та дата-марказ мавжуд — бу кўрсаткич кейинги 14 та давлатга тенг ёки ундан ҳам кўп.
Бундай устунлик етакчи булутли хизмат кўрсатувчилар ва технологик компанияларнинг йирик сармоялари билан изоҳланади. Кўп йиллик инвестициялар натижасида жаҳондаги булутли қувватлар ва сунъий интеллект инфратузилмасининг катта қисми айнан АҚШда жамланган.
Айрим соҳа баҳолашларига кўра, Америкадаги дата-марказлар умумий сони 5000 тадан ҳам ошади — фарқлар бундай объектларни таърифлаш ва ҳисоблаш услубларидаги тафовутлар билан боғлиқ.
Европа мамлакатлари ҳам дата-марказлар концентрацияси бўйича жаҳонда муҳим ўринларни эгаллайди. Буюк Британия, Германия ва Франция ҳар бири юзлаб объектларга эга. Бу давлатлар интернет алмашинувининг муҳим тугунлари ва халқаро булутли ҳамда IT хизматларини жойлаштириш марказлари ҳисобланади. Нидерландия, Испания ва Швеция ҳам дата-марказ инфратузилмаси ривожланган давлатлар қаторига киради.
Осиё минтақаси эса тез суръатларда ўсмоқда — бу ерда Хитой, Япония ва Ҳиндистон етакчилик қилмоқда. Рақамли хизматларга талабнинг ўсиши ва булут технологияларининг фаол жорий этилиши йирик Осиё бозорларида инфратузилманинг янада кенгайишига туртки бермоқда.
Рўйхатга ривожланаётган иқтисодиётлар ҳам киритилган — Индонезия, Малайзия ва Жанубий Корея. Шу билан бирга, нисбатан кичик ҳудудлар — Сингапур ва Ҳонгконг қулай географик жойлашув, юқори даражадаги алоқа имкониятлари ва бизнес учун мақбул муҳит туфайли кутилгандан ҳам юқори натижаларни намоён этмоқда.
