Президент Шавкат Мирзиёев Ўзбек тили байрами куни муносабати билан йўллаган табригида давлат тилининг жамият ҳаётидаги ўрни, таълим сифатини ошириш, илм-фанни ўзбек тилида ривожлантириш ва рақамли муҳитдаги имкониятларни кенгайтириш масалаларига тўхталди.
«Давлат тилига ҳурмат давлат хизматининг сифатида ҳам кўриниши керак», — деди Президент.
Бу фикр тилнинг аҳамияти фақат расмий мақом билан чекланмаслигини кўрсатади. Давлат тилининг жамиятдаги ўрни фуқароларнинг давлат идоралари билан мулоқотда ўз ҳуқуқ ва мажбуриятларини қанчалик тушуниши, расмий маълумотлардан қай даражада фойдалана олиши билан ҳам белгиланади.
Давлат идораларида тушунарли тил
Президент табригида қонун, қарор, йўриқнома ва мурожаатларга жавоблар равон, аниқ ва тушунарли тилда ёзилиши кераклиги таъкидланган. Фуқаро расмий ҳужжат мазмунини англаш учун ортиқча қийинчиликка дуч келмаслиги лозим. Шунинг учун давлат тилидан тўғри фойдаланиш фуқаролар билан самарали мулоқот қилишнинг муҳим шартидир.
Она тили — мерос ва тараққиёт воситаси
Президент ўзбек тилини аждодлардан авлодларга ўтиб келаётган бой мерос сифатида таърифлади. Тил инсоннинг ўзини англаши, оиласи ва Ватанига меҳрини ифода этиши, халқнинг хотираси, билим ва тажрибасини сақлашда муҳим ўрин тутади.
Таълимда тилни амалий ўргатиш
Президент таълим соҳасида ўқувчиларнинг ўқиш, тушуниш, гапириш ва саводли ёзиш кўникмаларига асосий эътибор қаратиш зарурлигини таъкидлади. Тилни билиш фақат грамматик қоидаларни ёдлаш эмас: ўқувчи матнни тушуниши, саволларга жавоб бериши ва фикрини оғзаки ҳамда ёзма шаклда ифода эта олиши керак.
Табрикда ўзбек тилини она тили сифатида ўрганаётган болалар билан уни давлат тили сифатида эгаллаётган ўқувчиларнинг эҳтиёжлари фарқ қилиши қайд этилган. Шу сабабли дарсликлар ва ўқитиш усулларини янгилашда бу жиҳат ҳисобга олиниши лозим.
Илм-фан ва таржимани ривожлантириш
Президент табригида ўзбек тилида замонавий илмий манбалардан фойдаланиш ва янги тадқиқот натижаларини баён этиш имкониятларини кенгайтириш муҳим вазифа сифатида кўрсатилган. Тиббиёт, муҳандислик, иқтисодиёт ва бошқа соҳаларда ишончли адабиётлар, сифатли таржималар ҳамда электрон ресурсларга эҳтиёж катта.
