Исроил ва АҚШ янги олий раҳбарни сайлайдиган Эрон Экспертлар кенгаши биносига зарба берди

3 март куни Исроил ҳарбийлари АҚШ Қуролли кучлари билан биргаликда Эроннинг Қум шаҳридаги Экспертлар кенгаши (Assembly of Experts) биносига ракета-ҳаво ҳужуми уюштирди.

Tasnim агентлиги ва Эрон давлат оммавий ахборот воситаларининг хабар беришича, зарба аввалроқ ўлдирилган олий раҳнамо Али Хоминаийнинг вориси учун овоз бериш жараёнида иштирок этадиган юқори мартабали диний ва сиёсий арбоблар бинода бўлиши мумкин бўлган пайтда амалга оширилган.

Эрон давлат телевидениесининг хабар беришича, одамлар бинодан олдиндан эвакуация қилинган ва дастлабки маълумотларга кўра, зарба пайтида Экспертлар кенгаши аъзолари орасида қурбонлар йўқ. Бироқ вайронагарчиликлар кўлами катта - бинога жиддий зарар етган.

Аввалроқ, 28 феврал куни Исроил ва АҚШ ҳаво ҳужуми оқибатида Али Хоминаийнинг ўзи ҳалок бўлган, бу эса ҳокимиятнинг тўсатдан ўзгаришига ва мамлакатнинг янги раҳбарини зудлик билан тайинлаш заруратига олиб келган эди.

Ҳодиса Исроил ва Эрон ўртасида аллақачон давом этаётган можаро кескинлашувининг янги босқичи бўлиб, унда ўзаро зарбалар, жумладан, Исроил ҳудудини ўққа тутиш ва минтақадаги Америка объектларига ҳужумлар кузатилмоқда.