Трамп: Украина бўйича музокаралар устувор йўналишлар рўйхатида “жуда юқори” ўринда

АҚШ раҳбари бу баёнотни 3 март, сешанба куни Оқ уйда Германия канцлери Фридрих Мерц билан учрашувда журналистларга мулоқот пайтида айтди.

“Мен буни оддий муаммо, деб ўйлагандим. Президентлар Путин ва Зеленский ўртасида улкан нафрат бор. Баъзан бир томонни айблайман, баъзан иккинчисини. Нимадир содир бўлишига ишонаман. Бу Иккинчи жаҳон урушидан бери энг оғир уруш”, — деди Трамп.

Трампнинг сўзларига кўра, сўнгги тўрт ҳафтада Украинада 32 минг нафар россиялик ва украиналик аскар ҳалок бўлган. АҚШ президенти, шунингдек, Украинадаги урушни “аҳмоқона” деб атади ва уни тўхтатиш учун икки томон ҳам келишувга келиши кераклигини таъкидлади. “Танго учун икки киши керак”, — деди АҚШ раҳбари.

Эрон билан боғлиқ уруш ҳақидаги саволларга жавоб берар экан, АҚШ президенти мамлакатининг қурол-яроғ захиралари “жуда катта”, “деярли чегарасиз” эканини билдирди. Шу билан бирга, Трампнинг айтишича, бу захираларнинг катта қисмини у Оқ уй раҳбари лавозимидаги аввалги президент Жо Байден “аҳмоқона тарзда бепул совға қилиб” Украинага бериб юборган. АҚШ раҳбари ҳозир украин армияси учун Америка қуролларини Европа мамлакатлари сотиб олаётганини эслатди.

Германия канцлери АҚШда икки кун бўлади. Феврал ойи охирида у Трамп билан музокаралар мавзуларидан бири АҚШ божлари бўлишини айтган эди. Мерцнинг сўзларига кўра, АҚШ Олий судининг Трамп жорий қилган тарифларнинг бир қисмини ноқонуний, деб топган қарори ортидан Вашингтон билан музокаралар “немис компаниялари миллиардлаб маблағларни қайтариб олиши” учун зарур.

“Биз бу масала бўйича жуда аниқ позицияни ишлаб чиқамиз, чунки тариф сиёсати — алоҳида аъзо давлатларнинг эмас, Европа Иттифоқининг иши. Мен Вашингтонга мувофиқлаштирилган позиция билан бораман”, — деган эди канцлер.

1 март куни Мерц, шунингдек, АҚШ ва Исроил бир кун олдин бошлаган Эрондаги урушни қўллаб-қувватлади. Мамлакатга берилган зарбаларнинг халқаро ҳуқуқ нуқтаи назаридан қонунийлиги ҳақидаги саволга канцлер Германия “дилемма”ни кўраётганини айтди: унинг фикрича, ўтган ўн йилликлар давомида халқаро ҳуқуқ доирасида ҳеч қандай қадамлар Теҳрон раҳбариятига нисбатан натижа бермаган. Германия канцлери назарида, ҳозир “ҳамкорлар ва иттифоқчиларга ақл ўргатадиган пайт эмас”.