Трамп сайлов қонунчилигини ўзгартиришни талаб қилмоқда

АҚШ президенти Доналд Трамп Сенат “Америка сайловчиларининг сайловларда иштирок этиш ҳуқуқини ҳимоя қилиш тўғрисида”ги қонунни (SAVE) маъқулламагунча, ҳеч қандай бошқа қонун лойиҳасини имзоламаслик билан таҳдид қилди. Оқ уй раҳбари бу ҳақдаги тегишли ёзувни 8 март, якшанба куни Truth Social ижтимоий тармоғида жойлаштирди.

“Мен президент сифатида бу қонун қабул қилинмагунча бошқа қонун лойиҳаларини имзоламайман, яна унинг юмшатилган вариантини ҳам эмас — олтин стандартга интилиш керак: шахсни тасдиқловчи ҳужжат ва фуқароликни тасдиқловчи ҳужжат тақдим этилиши шарт, почта бюллетенларига — йўқ, ҳарбий хизматчилар, касаллик ёки ногиронлик ҳолатлари бундан мустасно,” — деб ёзди Трамп.

The Hill нашри қайд этишича, Америка президенти 2026 йил 3 ноябрда бўлиб ўтадиган АҚШ Конгрессига оралиқ сайловлар арафасида овоз бериш қоидаларини ўзгартириш талаблари билан тобора фаолроқ чиқмоқда.

Нашр ёзишича, Трамп филибастер деб аталувчи тартиб — яъни парламент озчилиги томонидан қонун лойиҳаларини тўсиб қўйиш тактикаси қўлланган тақдирда ҳам республикачилар 60 овозлик талабни четлаб ўтиб, қонун лойиҳасини атиги 51 овоз билан қабул қилишга эришиши мумкин, деб ҳисобламоқда.

Трамп қонун чиқарувчи орган юқори палатасидаги республикачи кўпчилик раҳбари, Жанубий Дакота штатидан сенатор Жон Тюнга ушбу тактикани қўллаб-қувватлаш илтимоси билан мурожаат қилди.

SAVE Act АҚШ Конгресси Вакиллар палатаси томонидан феврал ойида маъқулланган бўлиб, республикачилар орасида кенг қўллаб-қувватланмоқда. Бироқ демократлар бу чорага қарши чиқиб, у рўйхатдан ўтган сайловчилар учун муаммолар туғдириши ва сайловда қатнашмоқчи бўлганларга тўсқинлик қилиши мумкинлигини таъкидламоқда.

2026 йил кузида АҚШ Конгрессига бўлиб ўтадиган оралиқ сайловларда демократлар Вакиллар палатасидаги кўпчиликни қайтариб олишга умид қилмоқда. Ҳозирда эса республикачилар ҳам қуйи палатани, ҳам Сенатни назорат қилмоқда. АҚШдаги оралиқ сайловларда одатда ҳукмрон партия кўпинча мағлубиятга учрайди.