Вашингтон Эрон энергетикасига зарбаларни вақтинча тўхтатди

АҚШ Эроннинг электр станциялари ва энергетика инфратузилмасига зарбаларни беш кунга кечиктиради. Мамлакат президенти Доналд Трамп Пентагонга шундай топшириқ берди. У 23 март, душанба куни Truth Social ижтимоий тармоғида бу қарорни Вашингтон ва Теҳрон ўртасида Яқин Шарқдаги қарама-қаршиликни “тўлиқ ва якуний тарзда ҳал этиш”га оид икки кунлик “жуда муваффақиятли ва самарали музокаралар”дан сўнг қабул қилганини ёзди.

“Ушбу чуқур, батафсил ва конструктив музокараларнинг руҳи ва оҳангидан келиб чиқиб, улар бутун ҳафта давом этади, мен ҳарбий вазирликка Эроннинг электр станциялари ва энергетика инфратузилмасига қарши ҳар қандай ва барча ҳарбий зарбаларни, келгуси учрашувлар ва муҳокамалар муваффақиятли ўтиши шарти билан, беш кунлик муддатга кечиктириш ҳақида топшириқ бердим”, — деб ёзди АҚШ президенти.

Бу сўзлардан кейин нефт нархлари кескин тушиб кетди, Европа бозорларида эса котировкалар ўсди.

Айни пайтда, Эроннинг давлат ахборот агентлиги Tasnim юқори лавозимли манбага таяниб, АҚШ билан музокаралар “бўлмаган ҳам, ҳозир ҳам йўқ”лигини хабар қилди.

Агентлик таянган манбага кўра, Доналд Трамп Эроннинг энергетика тизимига зарбаларни Теҳроннинг “ҳарбий таҳдидлари”, шунингдек, жаҳон иқтисодий инқирози хавфидан чўчигани учун кечиктирган. Tasnim таъкидлашича, Эрон ҳукумати “воситачилар орқали хабарлар” олган, аммо музокараларга киришмаган.

Шунга ўхшаш маълумотни Ислом инқилоби муҳофизлари корпуси (ИИМК)га яқин бўлган Эрон давлат агентлиги Fars ҳам эълон қилди.

Бундан бир кун олдин Трамп Эронга ултиматум қўйиб, Ислом Республикасидан 48 соат ичида Ҳўрмуз бўғозини очишни талаб қилган эди. Акс ҳолда, у АҚШ “зарба бериши ва бу мамлакатнинг турли электр станцияларини, энг йиригидан бошлаб, йўқ қилиши” билан таҳдид қилган.

Эрон армияси эса, агар электр станцияларига зарба берилса, минтақадаги АҚШнинг “барча энергетика, IT ва сувни чучуклаштириш объектлари” “нишонга айланиши”ни маълум қилди.

АҚШ ва Исроил 28 феврал куни Эронга зарба берган эди. Шундан сўнг Теҳрон, жумладан, жаҳон нефт ва суюлтирилган табиий газ ташувларининг тахминан бешдан бир қисми ўтадиган Ҳўрмуз бўғозини амалда ёпиб қўйди. Бу ҳаракатлар жаҳон энергетика ресурслари нархларининг кескин ўсишига олиб келди.