DW хабарига кўра, Зеленский 9 октябр куни АҚШ ва Россия ўртасида дизел экспорти бўйича эришилган келишувни танқид қилган.
«Путинга совғалар тинчликка хизмат қилмайди... Россия дизел учун яна қабиҳликлар билан “миннатдорлик билдиради”. Россияга нефт маҳсулотларини сотишга рухсат бериш — давом эттириш эмас, тугатиш керак бўлган урушга инвестициядир», — деб ёзган Украина раҳбари.
Зеленский Украина кескинликни пасайтириш бўйича ўзаро қадамларга тайёрлигини билдирган. У Россия Украина энергетика объектларига зарба беришни тўхтатса, Киев ҳам Россиянинг нефтни қайта ишлаш объектларига ҳужум қилмаслигини айтган.
«Агар Россия энергетикамизни вайрон қилмаса, Украина Россиянинг нефтни қайта ишлаш объектларини ёқмайди. Биз Америкага айнан шундай келишувни таклиф қиляпмиз ва АҚШнинг бундай муросага эришиш учун кучи етарли, деб ҳисоблаймиз», — деган Зеленский.
Украина президентининг фикрича, кескинликни пасайтириш бўйича аниқ келишувсиз Россияга қарши санкцияларни юмшатиш Москва фойдасига ишлайди ва урушнинг янада узоқ давом этишига шароит яратади.
Аввалроқ, 9 октябр куни АҚШ президенти Доналд Трамп Владимир Путин билан музокараларни «жуда муваффақиятли» деб баҳолаган. Унинг айтишича, суҳбатда Россия дизелини АҚШ ва жаҳон бозорига етказиб бериш бўйича келишувга эришилган.
Шу куни АҚШ Молия вазирлиги Трамп топшириғига биноан Хорижий активларни назорат қилиш бошқармаси — OFAC Россия дизел ёнилғисини жаҳон бозорига етказиб беришга рухсат берувчи вақтинчалик умумий лицензияни зудлик билан беришини эълон қилган.
Россия бош вазири ўринбосари Александр Новак эса ТАСС агентлигига Москва дизел экспортига қўйилган чекловларни режалаштирилган муддатдан олдин бекор қилишни бошлаётганини айтган.
Новак Россиянинг дизел экспорти истиқболда ойига 3 миллион тоннага етиши мумкинлигини ҳам тасдиқлаган.
