Трамп Эронга қурол етказиб берувчиларга 50 фоизлик божлар билан таҳдид қилди

АҚШ президенти Доналд Трамп Эронга қурол етказиб берадиган мамлакатлар Қўшма Штатларга импорт қилинадиган барча маҳсулотларга зудлик билан 50 фоизлик божлар жорий этилишига дуч келишини маълум қилди. Бу ҳақда Трамп Truth Social ижтимоий тармоғидаги постида маълум қилди.

«Эронга ҳарбий техника етказиб берувчи давлатлар бугундан бошлаб АҚШга кирадиган барча товарларга дарҳол 50 фоизлик бож солинади. Ҳеч қандай истисно бўлмайди!», деб ёзди у.

Трамп ўзининг бошқа постида АҚШ Эрон билан тарифлар ва санкцияларни юмшатиш бўйича музокаралар олиб бораётганини таъкидлади. Унинг сўзларига кўра, тинчлик шартномасининг 15 бандидан кўпи аллақачон келишилган.

Америка етакчисининг қўшимча қилишича, Эрон «жуда самарали режим алмашинувини бошдан кечирган». Унинг фикрича, Теҳрон энди уранни бойитиш билан шуғулланмайди, АҚШ эса «чуқур кўмилган ядровий чангни (уранни) қазиб олади ва йўқ қилади».

«У [уран] жуда синчков сунъий йўлдош кузатуви (Космик кучлар!) остида эди ва ҳозир ҳам шундай», деб қўшимча қилди у.

Эслатиб ўтамиз, АҚШ ва Эрон ўртасида ўт очишни тўхтатиш тўғрисидаги келишувга 8 апрелга ўтар кечаси, Трампнинг Эрон цивилизациясини йўқ қилиш билан таҳдид қилган ультиматуми муддати тугашидан бир неча соат олдин эришилган эди. 10 апрель куни Покистон пойтахти Исломободда АҚШ ва Эрон делегациялари ўртасида музокаралар бўлиб ўтиши кутилмоқда.

Трампнинг айтишича, АҚШ сулҳга рози бўлган, чунки Теҳрон Ҳўрмуз бўғозини «бутунлай, зудлик билан ва хавфсиз» очишга тайёрлигини билдирган. Эрон Миллий хавфсизлик олий кенгаши ўт очишни тўхтатишга розилигини тасдиқлади, бироқ Теҳрон ҳали ҳам АҚШ тажовузига жавоб беришга тайёрлигини таъкидлади.