“Credit House” иши бўйича ҳукм ўқилди

2025 йилнинг энг шов-шувли фирибгарлик иши дея таъриф берилган “Credit House” иши бўйича 9 киши жиноий жазога тортилди. Фирибгарлик схемасининг тепасида тургани айтилган Дмитрий Баженов 9 йилга озодликдан маҳрум қилинди. 3 нафар аёл судланувчига шартли жазо қўлланиб, улар очиқда қолдирилди.

ЖИБ Яккасарой туман судида “Credit House” амалдорларига нисбатан қўзғатилган жиноят иши биринчи инстанцияда кўриб чиқилиб, ҳукм ўқилди. Бу ҳақда суд мажлисида қатнашган Kun.uz журналисти хабар берди.

Жиноят иши судя Баҳодир Қаюмов раислигида кўриб чиқилди. Суд ҳукмига кўра, судланувчиларга қуйидагича жазо тайинланди:

• Ҳикматуллаев Баҳром Беҳзод ўғли – Жиноят кодексининг 168-моддаси 4-қисми “а, в” бандлари (фирибгарлик), 170-моддаси 2-қисми “а, в” бандлари (алдаш ёки ишончни суиистеъмол қилиш йўли билан мулкий зарар етказиш), 189-моддаси 1-қисми (савдо ёки хизмат кўрсатиш қоидаларини бузиш) ва 28,192-11-моддаси 2-қисми “а, б” бандлари (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) бўйича айбли деб топилиб, 8 йил 1 ой муддатга йилга озодликдан маҳрум қилиш;
• Шамсиддинов Алишер Муҳаммадиевич – Жиноят кодексининг 168-моддаси 4-қисми “а, в” бандлари билан айбли деб топилиб, БҲМнинг 234,5 баравари миқдорида жарима жазоси;
• Толипова Клара Нодир қизи – Жиноят кодексининг 168-моддаси 4-қисми “а, в” бандлари, 170-моддаси 2-қисми “а, в” бандлари, 189-моддаси 1-қисми ва 28,192-11-моддаси 2-қисми “а, б” бандлари бўйича айбли деб топилиб, 6,5 йил озодликдан маҳрум қилиш жазоси тайинланди. Жазо шартли ҳисобланиб, 3 йил синов муддати белгиланди;
• Миркамолов Ғайрат Рихсиевич – Жиноят кодексининг 168-моддаси 4-қисми “а, в” бандлари, 170-моддаси 2-қисми “а, в” бандлари, 189-моддаси 1-қисми, 28,192-11-моддаси 2-қисми “а, б” бандлари бўйича айбли деб топилиб, 8 йил 1 ой муддатга озодликдан маҳрум қилиш;
• Галямова Робия Албертовна – Жиноят кодексининг 168-моддаси 4-қисми “а, в” бандлари, 170-моддаси 2-қисми “а, в” бандлари, 189-моддаси 1-қисми ва 28,192-11-моддаси 2-қисми “а, б” бандлари бўйича айбли деб топилиб, 6,5 йил озодликдан маҳрум қилиш жазоси тайинланди. Жазо шартли ҳисобланиб, 3 йил синов муддати белгиланди;
• Амзаев Бахтиёр Леннарович – Жиноят кодексининг 168-моддаси 4-қисми “а, в” бандлари, 170-моддаси 2-қисми “а, в” бандлари ва 192-11-моддаси 2-қисми “а, б” бандлари бўйича айбли деб топилиб, 9 йил озодликдан маҳрум қилиш;
• Раҳимова Шоира Шокиржоновна – Жиноят кодексининг 168-моддаси 4-қисми “а, в” бандлари, 170-моддаси 2-қисми “а, в” бандлари ва 28,192-11-моддаси 2-қисми “а, б” бандлари бўйича айбли деб топилиб, 6,5 йил озодликдан маҳрум қилиш жазоси тайинланди. Жазо шартли ҳисобланиб, 3 йил синов муддати белгиланди;
• Маҳамадов Шуҳрат Шокиржон ўғли – Жиноят кодексининг 168-моддаси 4-қисми “а, в” бандлари, 170-моддаси 2-қисми “а, в” бандлари ва 28,192-11-моддаси 2-қисми “а, б” бандлари бўйича айбли деб топилиб, 8 йил 1 ой муддатга озодликдан маҳрум қилиш;
• Баженов Дмитрий Викторович – Жиноят кодексининг 168-моддаси 4-қисми “а, в” бандлари, 170-моддаси 2-қисми “а, в” бандлари, 189-моддаси 1-қисми, 192-11-моддаси 2-қисми “а, б” бандлари бўйича айбли деб топилиб, 9 йил озодликдан маҳрум қилиш.

Шунингдек, судланувчилардан жабрланувчиларга етказилган зарарни ундириш белгиланди.

Дмитрий Баженов ва Алишер Шамсиддиновнинг 681 млн сўмлик 2 та Tоyota, Шуҳрат Маҳаммадовнинг 93 млн сўмлик Spark ҳамда Ғайрат Миркамоловнинг 126 млн сўмлик Cobalt машиналари етказилган зарарни қоплаш учун ундирувга қаратилди. МЧЖларнинг ҳисобрақамидаги пуллар жабрланувчиларга тенг тақсимланиши маълум қилинди.

“Credit House” иши

Одамларга осон шартларда уй-жой олиб беришни ваъда қилган Тошкент шаҳридаги “Credit House” ҳамда “In Fin Strоy Invest” МЧЖ атрофидаги гап-сўзлар 2025 йил феврал ойида пайдо бўлганди. Қурувчи фирмалардан уй олиб, узоқ муддатга бўлиб тўлаш шарти билан харидорларга сотиб келган ушбу воситачи МЧЖларнинг амалдорлари одамлар пулини ўзлаштирганликда гумонланган.

Кейинчалик Kun.uz журналисти мазкур компаниялар билан шартнома қилган фуқаролар билан боғланиб, шубҳали кўринган бу “бизнес”нинг тепасида ким турганини ўрганганди.

ИИВнинг “Криминал” дастурида эълон қилинган дастлабки маълумотда 860 нафардан ортиқ фуқаро жабрланувчи сифатида эътироф қилинган ва аниқланган зарар миқдори 182 млрд сўм экани айтилган эди. Кейинроқ “Credit House” ва “In Fin Strоy Invest” МЧЖ иши бўйича тезкор махсус штаб тузилиб, жиноят иши тергови ИИВ ҳузуридаги Тергов департаменти иш юритувига олинди.

Суд жиноят ишини кўриб чиқишни бошлаганида Kun.uz дастлабки суд мажлиси жараёнларини жонли эфирда ёритганди.