Пешлавҳаларга оид янги тартиб лойиҳаси ва 13 бола ташиган Matiz ҳалокати – маҳаллий дайжест

Рақобат қўмитаси пешлавҳаларга оид янги тартиб лойиҳасини эълон қилди. Навоийда 13 нафар болани ташиётган Matiz ҳалокатга учради. Соғлиқни сақлаш тизими раҳбариятида ёппасига ўзгариш юз берди. Давлат чегарасидаги ноқонуний туннел учун жиноий жавобгарлик жорий этиладиган бўлди.

Соғлиқни сақлаш тизими раҳбариятида ёппасига ўзгариш юз берди

Президент Администрациясида ишлаган Элдор Одилов соғлиқни сақлаш вазири этиб тайинланди. 2024 йил январидан буён вазирликни бошқариб келган Асилбек Худоёров лавозимини тарк этди.

Шу билан бирга вазир ўринбосарлари ҳам бир кунда ишдан олиниб, ўрнига янгилари тайинланди. Жумладан, Алишер Бобоев, Элмира Боситхонова ва Фарҳоджон Тошпўлатов лавозимини тарк этди. Отабек Имомов вазирнинг биринчи ўринбосари бўлди, Жалолиддин Асамутдинов, Адхам Худайкулов, Шерзод Муҳамедов ва Илҳомжон Умурзақов ҳам ўринбосарликка тайинланди. Ёппасига ўзгаришлар сабаби ҳақида ҳозирча маълумот берилмади.

Рақобат қўмитаси пешлавҳаларга оид янги тартиб лойиҳасини эълон қилди

Рақобат қўмитаси ташқи ахборот воситаларини, хусусан пешлавҳаларга оид тартибни назарда тутувчи «Ташқи ёзувларни тартибга солиш тўғрисида»ги низом лойиҳасини жамоатчилик муҳокамасига қўйди. Ҳужжат билан амалиётда турли келишмовчиликни келтириб чиқараётган ва қонунчиликдаги бўшлиқ ҳисобланган айрим жараёнларга ва тушунчаларга аниқлик киритилмоқда.

Шунингдек, ҳужжатда пешлавҳа – савдо, умумий овқатланиш ва маиший хизмат кўрсатиш объектларида фаолияти таснифи (ташкилот номи, ихтисослашуви) тўғрисидаги маълумот ҳисобланиб (мисол учун: дорихона, сартарошхона, АЁҚШ, миллий таомлар, супермаркет, шифохона, озиқ-овқат, қурилиш ва хўжалик моллари дўкони), ташқи реклама объекти эмаслиги ва реклама жойининг паспортини олиш шарт эмаслиги белгиланган. Лойиҳа муҳокамаси 10 майга қадар давом этади.

Навоийда 13 нафар болани ташиётган Matiz ҳалокатга учради

Навоий вилояти, Нурота туманидаги оилавий боғча раҳбари бўлган аёл 13 нафар болани Matiz машинасида боғчага олиб кетаётганда йўл-транспорт ҳодисасига учради.

Ҳолат 5 май куни эрталаб содир бўлган. Тумандаги оилавий боғчалардан бирининг раҳбари бўлган 34 ёшли аёл 13 нафар тарбияланувчи ва ўзининг 3 ойлик чақалоғини Matiz машинасига миндириб ташиган. У ҳаракат пайтида бошқарувни йўқотган, оқибатда машина йўлдан чиқиб кетиб, ағдарилган.

ЙТҲ оқибатида аёл вафот этган, болалар эса турли даражада тан жароҳатлари олган. Айни вақтда бир бола кома ҳолатида, 8 нафари эса вилоят марказидаги шифохонага олиб кетилгани айтилмоқда.

Давлат чегарасидаги ноқонуний туннел учун жиноий жавобгарлик жорий этилади

Сўнгги пайтларда давлат чегарасида яширин туннел қазиб, товар ва маҳсулотларни ташиш, ноқонуний олиб ўтиш ҳолатлари кўпайиб бормоқда. Жумладан, 2016-2025 йиллар оралиғида 12 та ана шундай тунел аниқланган. Масалан, Фарғона ва Андижон вилоятларида туннеллар орқали 30 миллиард сўмдан ортиқ товар яширинча олиб кирилган. Бу ҳақда Қонунчилик палатасида маълумот берилди.

Қайд қилинишича, энди бу каби ҳолатлар учун жавобгарлик кучайтирилади. Жумладан, давлат чегараси орқали ер остида ноқонуний иншоот ва туннел қуриш, инфратузилма барпо этиш, улардан фойдаланиш ҳамда мазкур фаолиятни молиялаштириш учун алоҳида жиноий жавобгарлик жорий этилади.