DW хабарига кўра, Полша бош вазири Доналд Туск 12 октябр куни X ижтимоий тармоғида икки гумонланувчининг Германияда ушланганини маълум қилган.
Туск Мазовия воеводалигида жойлашган Starlink станциясига ўт қўйилишини «гибрид урушнинг яна бир акти» деб атаган. Унинг билдиришича, гумонланувчилар Полша суди олдида жавоб беради.
Полша ички ишлар вазири Марчин Кервинский эса уларга хорижий давлат топшириғига биноан қўпорувчилик содир этиш бўйича айблов қўйилишини билдирган.
Гумонланувчилар қаерда ушланган?
Bild ва Schwäbische Zeitung нашрларининг ёзишича, икки Туркия фуқароси Германиянинг Баден-Вюртемберг федерал еридаги Нюртинген шаҳрида қўлга олинган. Бу шаҳар Штутгартдан тахминан 30 километр жануби-шарқда жойлашган.
Schwäbische Zeitung ушланганларнинг исмларини Муслим Т. ва Умит Е. деб келтирган.
Bild маълумотига кўра, 12 октябр куни Германия полициясининг махсус бўлинмаси Берлиннинг Штакен ҳудудида уларнинг эҳтимолий шеригини ҳам ушлаган. Унинг Mercedes автомобили криминалистик экспертизадан ўтказилган. Нашрнинг ёзишича, мазкур шахс гумонланувчиларга ҳайдовчилик қилган бўлиши мумкин.
Станцияда нима бўлган эди?
Варшава яқинидаги Starlink ер усти станцияси 23 сентябр куни ўт қўйилиши оқибатида зарарланган. Ёнғин электр подстанцияси ва генераторни қамраб олган.
Bild хабарига кўра, станция қисқа муддат ишлашдан тўхтаган, кейин эса фаолиятини тиклаган. Ҳодисада ҳеч ким жароҳатланмаган.
Полша расмийлари ёнғиндан сўнг воқеани қўпорувчиликка уриниш деб баҳолаган.
Россияга оид гумонлар
Bild ҳужум ортида Россия турган бўлиши мумкинлиги ҳақида ёзган. Бироқ манбада қайд этилишича, Россиянинг ўт қўйишга алоқадорлигини тасдиқловчи бевосита далиллар ҳозирча йўқ.
Полша бош вазири ўринбосари Кшиштоф Гавковский 23 сентябр куни ҳодисанинг кўплаб белгилари Россиянинг ҳужумларни амалга ошириш бўйича янги доктринасига мос келишини айтган.
