Банк ривожланишида янги босқич
S&P Global Ratings Hayot Bank’ка “B-” даражасидаги узоқ муддатли эмитент кредит рейтинги ва “B” даражасидаги қисқа муддатли кредит рейтингини “Барқарор” прогноз билан тақдим этди.
Агентлик баҳосига кўра, рейтинглар банкнинг Ўзбекистон бозорида шаклланиб бораётган позициялари, кичик ва ўрта бизнес ҳамда якка тартибдаги тадбиркорлар билан ишлашга қаратилган стратегияси, профессионал жамоаси ва пухта ўйланган ўрта муддатли ривожланиш стратегияларини акс эттиради.
Рейтингларга эга бўлиш ёш хусусий банк учун муҳим босқич бўлди. Уч йилдан кам вақт ичида Hayot Bank халқаро баҳолаш даражасига чиқишга муваффақ бўлди. Бу воқеа нафақат банкнинг ўсиш суръатларини, балки Ўзбекистон банк тизимидаги кенгроқ ўзгаришларни ҳам кўрсатади: бозор очиқлигининг ортиши, рақобатнинг кучайиши, хусусий банк секторининг ривожланиши ва молиявий институтларга бўлган ишончнинг ошиши.
“Барқарор” прогнози нимани англатади?
S&P Global Ratings’нинг барқарор прогнози агентликнинг Hayot Bank’нинг кейинги 12 ой давомида акциядорнинг қўллаши, бозор позицияларининг кенгайиши ва тақсимланмаган фойда ўсиши ҳисобига капитал захирасини минимал талаб даражасидан юқорида мустаҳкамлаб боришини кутаётганини англатади.
Hayot Bank’да таъкидлашларича, рейтингларнинг олиниши банкнинг изчил ишлари ва Ўзбекистон молия секторидаги ислоҳотлар туфайли яратилган имкониятлар натижаси бўлди. Банк тизимининг либераллашуви, очиқлик сиёсати, бизнес муҳити яхшиланиши ва рақобатбардош муҳитнинг шаклланиши хусусий банкларга нафақат ички бозорда, балки халқаро молиявий майдонда ҳам фаолроқ намоён бўлиш имконини берди.
Ушбу рейтингни қўлга киритиш имкони Ўзбекистон Республикаси Президенти Шавкат Мирзиёев раҳбарлигида изчил амалга оширилаётган тизимли ислоҳотлар натижасида пайдо бўлди. Мамлакат молия секторининг кенг кўламли модернизацияси, валюта тартибга солиниши либераллашуви, бизнес муҳити яхшилангани ҳамда Ўзбекистоннинг глобал молиявий тизимга интеграциялашувига қаратилган сиёсат ёш хусусий банкларга қисқа муддатда халқаро даражага чиқиш имконини яратди.
Hayot Bank Бошқарув раиси таъкидлашича, S&P Global Ratings рейтинглари банк томонидан бир тарафдан ишонч аванси, бошқа тарафдан эса янада юқори стандартларга мос бўлиш мажбурияти сифатида қабул қилинмоқда. Унинг сўзларига кўра, банк секторидаги ислоҳотлар, бозор очиқлиги ва хусусий бизнес учун тенг шароитларнинг яратилиши ёш банкнинг қисқа вақт ичида халқаро эътирофга эришишига асос бўлди.
Халқаро рейтингларнинг олиниши Hayot Bank’нинг ҳамкорларни жалб қилиш ва ташқи молиявий бозорларда ишлаш имкониятларини ҳам кенгайтиради.
