«ПСЖ» «Барса»га ҳам 4 та гол урди, «Сити» Ҳоландсиз йирик ғалабага эришди
|12:225 05915 мин
Сешанба оқшомида ЕЧЛнинг 3-тури доирасида ўтказилган ўйинлар, голлар ва турнир жадвалидаги вазият.
Парижликлар кузнинг энг муҳим ўйинида ғалабага эришди, аммо жиддий йўқотишларга учради; Абдуқодир Ҳусанов тўлиқ ўйнаган, Ҳоланд захирадан ҳам тушмаган ўйинда «Сити» 5 та гол уриб ғалаба қозонди; «Ливерпул» эса 7 гол урилган ўйинда камбэк амалга оширди; Раҳмоналиев ва жамоаси «Боруссия»га ютқазди.
Бу ўйиндан мухлислар кўп нарса кутишаётганди ва жамоалар амалда ҳам томошабоп ўйин намойиш этиб беришди. Хвича Кварацхелия биринчи дақиқадаёқ дарвоза устунини пойлади. Бўлим давомида каталонияликлар посбони Жоан Гарсия жами саккиз сэйв ижро этишига тўғри келди. Парижликлар ўйин якунигача дарвоза соҳасига тўғри борган зарбалари сонини 14 тага етказишди.
Аммо биринчи бўлимда голлардан кўра жароҳатлар кўп бўлди. Аввалига Усмон Дембеле, унинг ортидан Дани Олмо жароҳат олиб майдонни тарк этди.
Уларнинг ўрнига захирадан тушган Ферран Торрес ва Фермин Лопес эса вазиятларни кўкка совуришди. Фақат бўлим охирларида Дезире Дуэ ўз маҳоратини намойиш этиб, ҳимоячилар қуршовида турган ҳолда қайтариб бўлмас зарба йўллаб, ҳисобни очди.
Four special strikes, which was the best? ⚽ @Heineken | #UCLGOTD https://t.co/0GDg8AG7lv
Иккинчи бўлим бошида эса каталонияликларнинг 19 ёшли ҳимоячиси Ҳави Эспарт ўнг қанотдан олдинга юрди ва ҳисобни тенглаштирди. Ўтказилган гол ортидан мезбонлар кетма-кет ёқимсиз ҳолатларга дуч келишди. Маркиниос ва Хвича жароҳат олиб майдонни тарк этишди. Гуржистонлик вингернинг жароҳати жиддий экани ва у мавсум охирларига қадар сафга қайта олмаслиги айтилмоқда.
Мавзуга оид
Кейин эса жамоалар етти дақиқа ичида биттадан гол уришди: Дуэ бурчакдан оширган тўпни Эрнандес бош билан дарвоза тўрига йўллади, кейин эса Ямал эндигина майдонга тушган Заир-Эмерининг хатосидан фойдаланиб, ҳисобни яна бир бор тенглаштирди.
Ўйин дуранг натижага қараб кетаётганди, аммо парижликлар асосий етакчиларидан айрилганига қарамай, номдор рақибга қарши ўйинни ғалабага айлантира олишди: сўнгги ўн дақиқаликда Витиня ва Руис биттадан гол уриб, каталонияликларнинг ғалабали сериясига нуқта қўйишди. «Барселона» бу ўйингача ютқазиш тугул, дуранг ҳам ўйнамаган, 11 ўйинда 48 гол уриб, йўлидан чиққан рақибга даҳшат солаётганди (ла лиганинг тўққиз ўйинида 39 гол, Чемпионлар лигасининг дастлабки икки ўйинида яна тўққизта). Аммо «ПСЖ» ЕЧЛда икки мавсумдан буён ғолиб бўлаётгани бежиз эмаслигини исботлади. Кетма-кет «Сити» ва «Барса»га қарши ўйинларда 4 тадан гол урган Луис Энрике шогирдлари асосий еврокубокда 13 ўйиндан иборат мағлубиятсиз серия (9 ғалаба, 4 дуранг) қайд этмоқда.
Кейинги турда «ПСЖ» «Вилярреал» меҳмони бўлади, «Барселона» «Астон Вилла»ни қабул қилади.
АПЛнинг охирги ўйинида майдонни оқсоқланиб тарк этган Ҳоланд захирада қолдирилди, Энцо Мареска унинг ўрнига 17 ёшли Самбани майдонга туширди. Шунингдек, сўнгги вақтларда захирада қолиб кетаётган ўзбекистонлик ҳимоячи Абдуқодир Ҳусанов ҳам бу сафар бошланғич таркибга киритилди.
АЕК номдор рақибга қарши 12 дақиқа чидаб берди. Кейин эса стандарт вазиятда ҳисоб очилди. Энцо Фернандес тўпни жонли девор устидан ўтказди, аммо дарвоза тўсинини пойлади, қайтган тўпга эса биринчи бўлиб Эллиот Андерсон етиб келди ва бўш дарвозани ишғол этди. Бу ушбу яримҳимоячи учун «шаҳарликлар» сафидаги илк гол бўлди. Танаффус арафасида эса Фоден Люис билан девор услубида ўйнаб, якуний зарбани аниқ йўллади ва ҳисобдаги фарқни оширди.
Иккинчи бўлим бошида «Сити» кутилмаганда гол ўтказиб юборди. Танаффусда ўйинга қўшилган Зини ҳимоячи Пилиосга голли ассист берди. Аммо бу гол билан греклар рақибнинг жаҳлини чиқариб юборди. Аввалига Фоден Шеркининг голига узатма берди – француз яримҳимоячиси ўз услубида ҳимоячини доғда қолдирди ва тўпни бурчакка аниқ йўллади. Кейин эса Фоден ҳет-трикни расмийлаштирди (3+1) ва «шаҳарликлар»нинг ЕЧЛнинг бир ўйинида уч гол урган олтинчи футболчисига айланди. Жамоанинг энг кўп ҳет-трик қайд этган футболчиси Ҳоланд эса ўйин охиригача захирада қолди ва муҳимроқ ўйинлар учун куч сақлади.
Кейинги турда «Манчестер Сити» сафарда «Лейпциг» билан ўйнайди, АЕКни «Реал»га қарши уй ўйини кутмоқда.
Исак, Вирц ва Барколя каби ҳужум вакиллари захирада қолдирилган ўйинда «Ливерпул» ЕЧЛ тарихидаги энг тезкор голини ўтказиб юборди (3 дақиқаю 54 сони). Жамоа сардори Виржийл ван Дейк бош билан тўпни дарвозабонга қайтаришга уриниб, Жорж Микаутадзега гол совға қилди.
Биринчи бўлим ўрталаридан ўтганда эса мезбонлар ҳимояси яна бир бор муваффақиятсизликка учради ва «Вилярреал»нинг бирданига икки футболчиси Алисон қаршисида пайдо бўлди: Салиба Кардонани голли узатма билан таъминлади. Аммо таблодаги 0:2 ҳисоби қизилларни синдира олмади. Аввалига Макаллистер бурчак зарбасидан кейин бош билан зарба йўллаб, ҳисобдаги фарқни қисқартирди. Танаффус арафасида эса Кардона қўпол хатога йўл қўйди ва Арауҳо Нгумоанинг узатмасини голга айлантириб, ҳисобни тенглаштирди – 2:2.
Иккинчи бўлимда эса «Ливерпул»ни тўхтатиб бўлмади ва уч дақиқа ичида ўйин тақдири ҳал бўлди. Ҳал қилувчи ҳужумда Макаллистер тўпни ўнг қанотга оширди ва ўзи жарима майдони томон югуриб, қайтариб берилган тўпни рикошет ёрдамида дарвоза тўрига йўллади. Кейин эса Цимикас майдон марказида тўпни олиб қўйди ва тезкор қарши ҳужум бошлаб берди, бу ҳужум Гакпонинг захирадан майдонга тушган Вирцга голли пас бериши билан якунланди. «Вилярреал» сафида захирадан тушган Олувасейининг голи эса мерсисайдликларнинг ЕЧЛдаги ғалабали сериясини йўққа чиқара олмади. Андони Ираола жамоаси уч турда 9 очко тўплаган ҳолда «ПСЖ» билан биргаликда турнир жадвалини бошқармоқда.
Кейинги турда «Ливерпул» «Фенербаҳче» меҳмони бўлади, «Вилярреал» уйда «ПСЖ»ни қабул қилади.
Дастлабки икки турда иложсиз ҳолатда ютқазган неаполитанликлар бу сафар норвеглар билан бирга голлар шоусини уюштиришди.
Маттео Политано илк дақиқадаёқ ҳисобни очди, бўлим давомида меҳмонлар жавоб голини уришди, аммо Скотт Мактоминей барибир жамоасини танаффусга ғолиб ҳолда олиб чиқди.
Иккинчи бўлимда «Будё» яна мувозанатни тиклади. Мактоминай яна неаполитанликларни олға бошлашига тўғри келди: 75-дақиқада у ҳаводаги курашда рақибдан устун келди ва бош билан тўпни дарвоза тўрига жойлади. 88-дақиқада Один Бортфутнинг автоголи ўйин тақдирини ҳал қилди. Норвегларнинг 90+4-дақиқадаги навбатдаги жавоб голи ўйин тақдирини ўзгартира олмади.
Кейинги турда «Наполи» сафарда «Порту» билан ўйнайди, «Будё»ни «Лилл»га қарши уй учрашуви кутмоқда.
Турнирни «Викинг» ва «Слован» каби рақиблар устидан қозонилган ғалабалар билан бошлаган ва пешқадамлар қаторида бораётган «Штутгарт» бу турда жиддий рақибга қарши ўйнашига тўғри келди. Ўз майдонида ўйнаган немислар ғалабали сериясини давом эттириши ҳам мумкин эди – Облак биринчи бўлим давомида бир неча бор қутқаришига тўғри келди, аммо Левелингнинг зарбаси қаршисида ожиз қолди.
Танаффусда Диего Симеоне Дэвид ўрнига Лукманни майдонга ташлади ва ушбу ўзгариш ўзини оқлади. Иккинчи бўлим бошида нигериялик вингер чап қанотдан тўпни жарима майдонига узатди, Ҳулиан Алварес эса бир тегинишда тўпни дарвоза тўсини остидан тўрга жойлади.
64-дақиқада эса мадридликлар озчилик бўлиб қолишди: Мортен Юлманд майдон марказида Анжело Штиллерга қўполлик қилди ва ҳакам томонидан қизил карточка била жазоланди.
Қолган дақиқаларда ҳисоб ўзгармай қолди.
Уч турдан кейин атиги тўрт очкога эга бўлган мадридликлар кейинги турда уйда «Бавария» билан ўйнайди, бундеслигадан кўра ЕЧЛда яхшироқ қатнашаётган «Штутгарт»ни «Галатасарой» стадионидаги яна бир қийин ўйин кутмоқда.
«Рома» «Слован»га қарши ўйинда ҳеч қандай қаршиликка учрамади – 4:0. Словаклар – қаторасига уч турда мағлуб бўлган ҳолда (тўплар нисбати 1:13) лиганинг асосий аутсайдери бўлиб турибди.
Римликлар икки бўлимда иккитадан гол уришди: аввалига ҳимоячи Марио Эрмосо стандарт вазиятда ҳисобни очди. Кейинги учта гол жамоа марказий ҳужумчиси Дониэлл Маленнинг фаоллиги билан урилди. Аввалига унинг зарбаси дарвозабондан қайтганида тўпга Науэл Молина биринчи бўлиб етиб келди. Иккинчи бўлми бошида унинг узатмасини Никколо Пизилли голга айлантириб, ҳисобни йирик кўринишга келтирди. Бироз ўтиб Маленнинг ўзи пеналтидан фойдаланиб, якуний ҳисобни ўрнатди – 4:0.
Ўтган турда «Астон Вилла» майдонида жавобсиз 6 та гол қабул қилиб олган «Фанербаҳче» илк дақиқалардан олдинга ташланди. Аввалига Ўғуз Ойдин тезкор гол билан ҳисобни очди, бир неча дақиқа ўтиб Гринвуд ҳисобдаги фарқни оширди. Кўпчилик турклар бу ўйинда йирик ҳисобда ғалаба қозониб, тўплар нисбатини яхшилаб олишига тайёрлана бошлаганди, аммо чехлар сочилиб кетмади ва дарҳол жавоб голини уришди. Маттео Гендузининг жарима майдони яқинидаги қўпол хатоси меҳмонларга ўйинга қайтиш имконини берди.
Танаффусдан кейин «канарейкалар»да ўйинни ҳал қилиш учун етарлича имкониятлар бўлди, аммо вазиятлардан фойдалана олмади. Ўйин охирида эса прагаликлар ҳисобни тенглаштиришди. Умуман, дуранг ҳисоб ўйинга мос натижа бўлди: зарбалар бўйича ҳисоб 14:15, дарвоза соҳасига тўғри борган зарбалар сони 5:4 кўринишида эди.
Кейинги турда «Фенер» ва «Славия» АПЛ топ-клублари синовидан ўтади – мос равишда «Ливерпул» ва «Арсенал»ни қабул қилишади.
