«Дунё» ахборот агентлиги хабарига кўра, тақдирлаш маросими 15 октябр куни Римдаги ФАО бош қароргоҳида ўтказилган. Унда қишлоқ хўжалиги, озиқ-овқат тизимлари ва қишлоқ ҳудудларини ривожлантириш, инсонлар ҳаётини яхшилашга ҳисса қўшаётган хотин-қизлар эътироф этилган.
Мастурахон Сайфутдинова қишлоқ хўжалиги маҳсулотларини етиштириш ва соҳага инновацион ёндашувларни жорий этиш борасидаги фаолияти учун рўйхатдан жой олган.
Шунингдек, унинг «Анор етиштирувчилар» уюшмасини ташкил этиш ташаббуси, соҳага оид дарслик ва қўлланмалар яратишдаги хизматлари ҳам қайд этилган.
Ўзбекистон вакилини ФАО бош директори Цюй Дунъюй шахсан тақдирлаган. Алоҳида учрашувда у бу натижани Сайфутдинованинг шахсий ютуғи билан бирга, Ўзбекистонда қишлоқ хўжалиги ва хотин-қизларни қўллаб-қувватлаш йўлидаги ишлар билан ҳам боғлаган.
Хабарда Сайфутдинованинг етакчилик салоҳияти, тиришқоқлиги ва ташаббускорлиги халқаро эътирофга асос бўлгани таъкидланган.
