Silk Road Finance & Technology Forum: дунё етакчилари Тошкентда жамланади

2026 йил 24–26 август кунлари Тошкент шаҳри халқаро молия ва технология соҳасидаги энг нуфузли анжуманлардан бири — Silk Road Finance & Technology Forumʼга мезбонлик қилади. Глобал Finance & Technology Network (GFTN) билан ҳамкорликда ташкил этилаётган форум дунёнинг етакчи сиёсатчилари, молия институтлари раҳбарлари, инвесторлар ва технология соҳаси етакчиларини бир майдонда жамлайди.

Марказий Осиё жаҳон иқтисодиёти ва инвестиция харитасида тобора муҳим ўрин эгаллаб бораётган бир пайтда, Silk Road Finance & Technology Forum халқаро ҳамкорлик, инновациялар ва инвестицияларни ривожлантиришга қаратилган муҳим мулоқот майдонига айланади.

Форумда халқаро сиёсий доиралар вакиллари, марказий банклар раҳбарлари, институционал инвесторлар, глобал технология визионерлари ҳамда йирик компаниялар раҳбарлари иштирок этиши кутилмоқда. Улар молия технологиялари, рақамли трансформация, сунъий интеллект, инвестициялар, молиявий инклюзивлик ва барқарор иқтисодий ўсиш масалаларини муҳокама қиладилар.

Ушбу нуфузли тадбир Тошкентнинг халқаро молия ва технология маркази сифатидаги нуфузини янада мустаҳкамлаш, Марказий Осиё мамлакатлари учун янги инвестиция ва ҳамкорлик имкониятларини яратишга хизмат қилади.

Silk Road Finance & Technology Forum минтақа ва глобал бозорлар ўртасидаги алоқаларни кучайтириш, инновацион ғоялар ва илғор ечимларни бирлаштиришга қаратилган муҳим платформа бўлиши кутилмоқда.