Французларда кайфият бўйича ҳаммаси жойида
Франция – Марокаш 2:0
Голлар: Мбаппе, 60 (1:0). Дембеле, 66 (2:0)
Аниқ ижро этилмаган пеналти: Мбаппе, 28’
Франция: Менян, Упамекано, Салиба, Дин, Кунде (Гюсто, 87), Коне (Заир-Эмери, 71), Рабио, Олисе, Дуэ (Барколя, 77), Дембеле, Мбаппе (Матета, 77)
Марокаш: Буну, Мазравий, Диоп, Салоҳиддин (Оуади, 74), Ҳакими, Буадди (Амрабат, 62), Ал-Айнавий, Унаи, Талби (Сбаи, 85), Диас (Ясин, 74), Ал-Ҳаннус (Раҳими, 62)
Огоҳлантириш: Диоп, 63
Килиан Мбаппе жаҳон чемпионатида Франция миллий жамоасини ўз ортидан эргаштиришда давом этмоқда. Чоракфиналда Марокашга қарши ўйинда 27 ёшли ҳужумчи биринчи бўлимда пеналтидан фойдалана олмаганди, лекин иккинчи бўлимда ажойиб гол уриб ҳисобни, кейин эса Дембеленинг голига ассистентлик қилди.
Француз ҳужумчиси иккинчи бўлимнинг биринчи ярмида 11 метрлик жарима зарбаси ишлади – у Нуссайр Мазравийнинг жарима майдони ичидаги подкатидан кейин йиқилди ва бош ҳакам Факундо Телио дарҳол «нуқта»ни кўрсатди. Жабрланувчининг ўзи зарба бериш учун йўл олди.
Аммо у дарҳол зарба бера олмади – вазиятга VAR аралашиб, эпизодни синчиклаб кўриб чиқиш бошланди. Мбаппе 3 дақиқадан ортиқ вақт давомида кутиб туришга мажбур бўлди, видеотакрор у актёрлик маҳоратини ишга солганини кўрсатди, лекин ҳакам қарорини ўзгартирмади.
Кейин эса ҳужумчи жуда ишончсиз зарба йўллади – пастдан ва кучсиз келган тўпни дарвозабон Ёсин Буну осонлик билан қайтарди.
Афтидан, пеналтини кўриб чиқиш жараёни ҳаддан ташқари чўзилиши ҳужумчига таъсир кўрсатган ва у аниқ зарба бера олмагач, ҳакамнинг олдига келиб, эътироз билдирди.
Мбаппе Франция миллий жамоасининг жаҳон чемпионатларида пеналтидан гол ура олмаган иккинчи футболчисига айланди, биринчиси 2014 йилги мундиалда муваффақиятсизликка учраган Карим Бензема бўлганди.
Буну эса ўз сейви билан пеналтилар бўйича ҳақиқий мутахассис сифатида тарихга кирди. Opta хабарига кўра, 35 ёшли марокашлик ЖЧда ўйиндан кейинги серия ҳам ҳисобланганда, жами тўрт бор пеналти қайтарган. Бундай натижа билан шу вақтгача фақат Икер Касиляс, Доминик Ливакович, Даниел Субашич, Серхио Гойкочеа ва Ҳаралд Шумахер каби дарвозабонлар мақтана оларди. Бунуда бу борадаги умумий статистика ҳам юқори – у 9 та пеналтидан атиги иккитасини ўтказган (4 тасини қайтарган, яна 3 зарба хато кетган).
