Ўзбекистонда бензин нархи Марказий Осиёда энг юқори экани маълум бўлди

Ўзбекистонда АИ-95 бензини нархи Марказий Осиё мамлакатлари орасида энг юқорилардан бири бўлиб қолмоқда, гарчи жаҳон миқёсида бу кўрсаткич ўртача даражадан паст бўлса-да. GlobalPetrolPrices маълумотларига кўра, республикада 1 литр бензин Қозоғистон, Қирғизистон, Россия, Беларус ва Озарбойжондагидан қимматроқ туради.

2026 йил 6 июл ҳолатига кўра, Ўзбекистонда 1 литр бензиннинг ўртача нархи 1,342 долларни ташкил қилади. Шу билан бирга, жаҳон бўйича ўртача нарх бир литр учун қарийб 1,46 долларни ташкил этади. Шу сабабли Ўзбекистондаги кўрсаткич ҳозирча глобал ўртача даражадан паст, бироқ МДҲ ва Марказий Осиёнинг кўплаб мамлакатлариникидан анча юқори.

Қўшни давлатлар билан солиштирганда, Ўзбекистон автомобил ёқилғиси нархи бўйича минтақадаги энг қиммат мамлакатлардан бири бўлиб қолмоқда. Таққослаш учун: Туркманистонда 1 литр бензин нархи 0,43 долларга тўғри келади — бу дунёдаги энг паст кўрсаткичлардан биридир. Озарбойжонда — 0,676 доллар, Қозоғистонда — 0,687 доллар, Россияда — 0,940 доллар, Қирғизистонда — 1,016 долларни ташкил этади. МДҲ ҳудудида бензини энг ҳамёнбоп давлатлар қаторига кирувчи Беларусда ҳам ёқилғи нархи арзонроқ (0,942 доллар).

Бензиннинг энг арзон нархлари бир қатор мамлакатларда қайд этилган бўлиб, уларда 1 литр ёқилғи жаҳондаги ўртача нархдан бир неча баравар арзон. Ливияда 1 литр ёқилғи нархи тахминан 0,02 долларни ташкил этади ва бу уни ёқилғи арзонлиги бўйича мутлақ етакчига айлантиради. Шунингдек, Эронда бу кўрсаткич 0,03 долларни, Венесуэлада тахминан 0,04 доллардир.

Бензиннинг энг юқори нархи Ҳонгконгда қайд этилган - 4,06 доллар. Шунингдек, Малави (3,23 доллар) ва Дания (2,60 доллар) ҳам бензин нархи энг қиммат давлатлар учлигига киради.