DW нашрининг dpa агентлигига таяниб хабар беришича, Германияда «ёнилғи чегирмаси» — Tankrabatt 1 октябрга ўтар кечаси кучга кирган.
Tankkönig портали маълумотларига кўра, 30 сентябр соат 23:41 дан 1 октябр соат 00:41 гача бензиннинг мамлакат бўйича ўртача нархи литрига 10–11 центга камайган. 1 октябр эрталаб ҳам аввалги ҳафталардаги нархларга нисбатан деярли шундай фарқ сақланиб қолган.
Германия автомобил клуби — ADAC маълумотларига кўра, кўплаб ёнилғи қуйиш шохобчаларида энг арзон бензин тури — Super-E10 нархи литрига 2 евродан пастлаган.
Бироқ ҳудудлар ўртасида фарқ бор. Мюнхен, Штутгарт ва Лейпцигда бундай нарх жуда кўп шохобчаларда, Берлинда эса кўплаб шохобчаларда қайд этилган. Гамбургда бензинни 2 евродан арзонга фақат айрим шохобчалардан топиш мумкин бўлган.
Кёлнда эса 1 октябр эрталаб ҳолатига бензин нархи 2 евродан тушган бирорта шохобча қайд этилмаган. Шунга қарамай, Tankkönig кузатувларида мамлакат бўйича ўртача нарх 2 евродан сезиларли паст бўлган.
Чегирма қандай ишлайди?
Литрига 16,7 центлик солиқ енгиллиги 1 октябр соат 00:00 дан бошлаб омборлар ва нефтни қайта ишлаш заводларидан чиқарилган бензин ҳамда дизел ёнилғисига татбиқ этилади.
Бироқ бу чакана нархлар айнан 16,7 центга пасайиши кафолатланганини англатмайди. Ёнилғи қуйиш шохобчалари нархни тўғридан тўғри шунчага туширишга мажбур эмас.
«Бу чегирма истеъмолчиларга тўлиқ ҳажмда етиб борадими-йўқми, яқин кунларда маълум бўлади», — дея қайд этган dpa.
Ҳукумат мазкур чорани бензин ва дизел нархларининг кескин ошишига жавобан қабул қилган. Агентликка кўра, сентябр ёнилғи нархлари бўйича бошқа ойлардан анча қиммат бўлган ва бу умумий инфляция даражасига ҳам таъсир кўрсатган.
Солиқ имтиёзлари баҳсларга сабаб бўлмоқда
Ҳукумат чорасини танқид қилаётганлар чегирманинг амалдаги аниқ ҳажмини ҳисоблаш қийинлигини айтмоқда. Уларнинг фикрича, бундай енгилликлар автомобил эгаларининг ёнилғини тежашга қизиқишини пасайтиради, солиқ камайишидан келадиган фойда эса истеъмолчиларга тўлиқ етиб бормайди.
