Россия президенти Владимир Путин Москва ва Вашингтон ўртасидаги сиёсий зиддиятларга қарамай, Россия паст орбитали сунъий йўлдошлар гуруҳи масаласида SpaceX раҳбари Илон Маск ҳамда бошқа америкалик ҳамкорлар билан алоқани сақлаб турганини билдирди. Бу ҳақда у 28 октябрь куни Москвада ўтаётган Россия — Африка саммитидаги кўргазмани кўздан кечириш чоғида айтиб ўтди, деб хабар берди ТАСС.
Путин Маскни «ҳақиқатан ҳам даҳо» инсон деб атади. У шундай деди:
«Биз америкалик ҳамкорлар, жумладан, жаноб Маск билан яқин алоқадамиз, зеро орбитада бир-биримизга халақит бермаслик, муайян интизом ва тартибга риоя қилиш жуда муҳим».
Путиннинг сўзларига кўра, Россия «барча сиёсий масалаларга қарамай» ушбу ҳамкорликни қадрлайди ва Starlink’нинг муқобилини яратаётганидан фахрланади.
Гап Путин Россиянинг бу соҳадаги илк қадами деб атаган «Рассвет» тизими ҳақида бормоқда. Кенг полосали интернет учун мўлжалланган ушбу сунъий йўлдошлар гуруҳини «Бюро 1440» компанияси ишлаб чиқмоқда. Компания дастлабки 16 та серияли сунъий йўлдошни март ойида, иккинчи туркумни эса июлда орбитага олиб чиққан эди. Хизматни тижорий мақсадда ишга тушириш келаси йилга режалаштирилган бўлиб, 2035 йилга бориб сунъий йўлдошлар сони 900 тадан ошиши керак.
Шу ойнинг бошида Володимир Зеленский Украина Қуролли кучларига Россиянинг ракета ва дрон ҳужумларини қайтаришда ёрдам бераётган Starlink тармоғига уланиш чеклангани учун жавобгарликни Маск ва Доналд Трампнинг зиммасига юклаган эди. Трамп интернет тезлигини пасайтиришга буйруқ берганини рад этди, Маск эса Украинани тармоқдан дронлар ёрдамида ҳужумкор зарбалар беришда фойдалангани учун хизмат қоидаларини бузганликда айблади. 24 октябрь куни Киев чекловлар олиб ташланганини маълум қилди. The Wall Street Journal маълумотларига кўра, бундан аввал Трамп Маскдан ушбу чекловларни бекор қилишни сўраган.
