Трамп Путин ва Зеленский билан уч томонлама музокаралар яқин вақтлар ичида бўлиб ўтишига умид билдирди. АҚШ президенти журналистлар қаршисида бундай учрашув «жуда тез фурсатда» бўлиб ўтиши мумкинлигини айтди. Трамп саммит давомида «сезиларли ютуқларга эришилиши»га умид қилмоқда. У бундай музокаралар қаерда ва қачон ўтказилиши борасида тўхталмаган.
АҚШ, Украина ва Россия делегацияларининг уч томонлама учрашуви бўйича вазият анча ойдинлашган. Украина президенти Володимир Зеленский Финландия президенти Александр Стубб ва Норвегия бош вазири Йонас Гар Стёренинг Владимир Путин билан суҳбатидан сўнг «руслар Абу-Дабидаги учрашувга жиддий қизиқиш билдираётгандек ҳиссиёт борлиги»ни айтди.
Зеленскийнинг сўзларига кўра, Абу-Дабидаги музокаралар чоғида «энергетика соҳасида, шунингдек, денгизда вазиятни юмшатиш, асирларни алмашиш ва уларни уйга қайтариш бўйича қадамлар»ни муҳокама қилиш режалаштирилган.
Путин телефон мулоқоти чоғида Финландия президенти ва Норвегия бош вазирига славянлар тарихи тўғрисида маъруза ўқиган. Натижада мулоқот ярим соат ўрнига қарийб бир ярим соатга чўзилган, дея хабар беради Financial Times манбалари. Стубб ва Стёре эса Путиннинг Европа билан мулоқотга қанчалик жиддий ёндашаётганини аниқлаб олиш учун унинг гапини бўлмасликка қарор қилишган.
Кремл матбуот хизмати эса ушбу мулоқот тўғрисидаги изоҳида «Путин Украинадаги можаро зонасидаги мавжуд вазиятга баҳо бериб, унинг асл сабабларини эслатиб ўтгани»ни қайд этганди. FT нашрига кўра, суҳбатда ўт очишни зудлик билан тўхтатиш масаласи муҳокама қилинмаган.
Дания бош вазири Метте Фредериксен Сутбб ва Стёрени Путин билан гаплашгани учун танқид қилган. Унинг айтишича, бу ташаббус Евроиттифоқнинг бошқа мамлакатлари билан келишилмаганди. Финландия президенти бунга жавобан у ва Стёре «бу мулоқотни Европа вакиллари сифатида эмас, балки ўз мамлакатлари раҳбарлари сифатида ўтказгани»ни айтган. Евроиттифоқдагилар ҳозирда Россия билан музокараларга кимни юборишни кўриб чиқмоқда. Стубб эса Доналд Трамп билан яхши муносабатларга эгалиги туфайли эҳтимолий номзодлардан бири саналади.
Европа Иттифоқи вакиллари ҳам Абу-Дабидаги музокараларда қатнашмоқчи. Euronews маълумотига кўра, делегацияга Еврокомиссия раиси Урсула фон дер Ляйеннинг аппарати раҳбари Бёрн Зайберт раҳбарлик қилади. Телеканал бундай форматдаги – АҚШ, Украина, Россия ва Евроиттифоқ вакиллари иштирокидаги учрашув катта уруш бошланганидан буён биринчиси бўлишига эътибор қаратган.
