Тошкентда 100 км узунликда икки қаватли пулли ҳалқа автомобил йўлини қуриш бўйича Хитойнинг “China Railway Construction” компанияси билан 1 млрд долларлик битим имзоланган.
Бу ҳақда пойтахт ҳокимининг транспорт ва йўл инфратузилмаси масалалари бўйича ўринбосари Абдураҳмон Бахтиев шаҳар кенгашига берган ҳисоботида айтиб ўтди.
Ҳисоботда келтирилишича, Тошкент шаҳрида йўл инфратузилмаси лойиҳалари бўйича Хитой компаниялари билан қуйидагича келишувлар имзоланган:
China Construction – 500 млн долларлик 3 та йўл ўтказгич, 4 та кемпинг масканини барпо этиш ва 27 км йўлларни капитал таъмирлаш;
SINO-Hunan – 1 млрд долларлик 7 та туннел, 5 та йўл ўтказгич, 16 та кўчада 57 км BRT йўлаклари ва 279 км йўлларни қуриш;
China Railway Construction – 1 млрд долларлик 100 километрли 2 қаватли Тошкент ҳалқа пуллик автомобиль йўлини барпо этиш;
Shanghai Construction – 100 млн долларлик 1 та кемпинг марказини барпо этиш ва 7,7 км йўлларни таъмирлаш;
Xinjiang Hui’er Agricultural – йўлбўйи ҳудудларини ландшафт дизайни асосида кўкаламзорлаштириш.
Қайд этилишича, Тошкент шаҳрида Интеллектуал транспорт тизимини жорий этиш бўйича Германия мутахассислари иштирокида техник топшириқ ишлаб чиқилган.
Тизимни ишлаб чиқишда, адаптив светофор ва сунъий интеллект асосида транспорт таҳлили йўналишида тажрибага эга 12 та (шу жумладан, SWARCO – Австрия, Siemens Mobility – Германия, Cubic Transportation Systems – АҚШ, Huawei – Хитой) компаниялар билан музокаралар ўтказилган.
Тошкент шаҳрининг Транспорт мастер режаси ва макромоделини ишлаб чиқиш мақсадида АҚШ, Буюк Британия, Германия, Италия, Канада, Россия, Швеция ва Франция давлатларининг 90 дан ортиқ компаниялари иштирокида танлов ўтказилган. Натижада, ғолиб деб топилган “Step city” компаниясига 2026 йил сентябр ойи якунига қадар шаҳарнинг транспорт мастер режаси ва макромоделини ишлаб чиқишни якунига етказиш топширилган.
