Адлия вазирлиги қишлоқ хўжалиги корхоналари томонидан биржа савдолари орқали харид қилинган дизел ёнилғиси қийматининг бир қисмини қоплаш учун субсидия ажратиш тартибини белгиловчи вақтинчалик низомни давлат рўйхатидан ўтказди.
Янги тартибга кўра, 2026 йил 1 апрелдан 1 июлгача пахта ва буғдой етиштирувчи фермерлар биржа савдолари орқали харид қилган дизел ёнилғисининг 1 тоннаси нархи 13 млн сўмдан юқори бўлган тақдирда, ошган сумманинг 2 млн сўмгача бўлган қисми давлат томонидан субсидия сифатида қоплаб берилади.
Субсидияни олиш учун дизел ёнилғиси фақат биржа савдолари орқали харид қилинган бўлиши, фермернинг ер майдонлари ва экин турлари Агропортал тизимига киритилган бўлиши ҳамда ёнилғи апрел–июн ойларида агротехнологик харитада белгиланган ишлар учун сарфланган бўлиши лозим.
Субсидия миқдори Агропортал маълумотлари асосида автоматик ҳисобланади ва маблағлар Агентлик томонидан фермернинг тижорат банкидаги махсус ҳисобварағига уч иш куни ичида ўтказилади.
Агар техник носозлик ёки маълумот алмашинувидаги узилишлар сабабли фермер ҳақидаги маълумотлар Агентликка етказилмаган бўлса, у ёзма равишда ёки Агропортал орқали электрон шаклда мурожаат қилиши мумкин.
