ФИФА президенти Жанни Инфантинонинг таъкидлашича, ташкилот барча фикр-мулоҳазаларни ўрганиб чиққанидан сўнг ушбу ташаббус футбол жамоатчилиги орасида келишмовчиликларни кучайтиргани маълум бўлган.
«Барча нуқтаи назарларни диққат билан тингладик. Лойиҳа турли қарама-қаршиликларга сабаб бўлди ва бу энди унинг дастлабки мақсадига мос келмайди. Бизнинг асосий вазифамиз ҳар доим футболни бирлаштириш ва ривожлантириш бўлиб қолади», — деди Инфантино.
Унинг сўзларига кўра, ФИФА ушбу таклиф устида ишлашни тўхтатади. Яқин вақт ичида барча манфаатдор томонлар иштирокида учрашув ўтказилиб, футболни янада ривожлантириш масалалари муҳокама қилинади.
Аввалроқ Жанни Инфантино жаҳон чемпионатлари ва бошқа мусобақаларнинг айрим тижорат ҳуқуқларини хусусий инвесторларга таклиф этиш режасини илгари сурган эди. ОАВ маълумотларига кўра, эҳтимолий инвесторлар орасида АҚШ президенти Доналд Трампнинг куёви Жаред Кушнернинг қариндошлари билан боғлиқ тузилмалар ҳам тилга олинган.
Инфантино ушбу ташаббус миллий футбол ассоциацияларининг даромадларини тўрт бараваргача оширишини таъкидлаган ва уларга қарор қабул қилиш учун 19 сентябргача муҳлат берган эди.
Бироқ 30 июл куни УЕФАга аъзо барча 55 миллий футбол ассоциацияси мазкур режа амалга оширилса, ФИФА мусобақаларини бойкот қилишга тайёрлигини билдирди.
УЕФА баёнотида «Келажак авлодлар учун ишончли бошқарувга топширилган бойликни сотишга ҳеч кимнинг маънавий ҳаққи йўқ», дея таъкидланган.
Европа томонининг танқидига Шимолий ва Марказий Америка ҳамда Кариб ҳавзаси мамлакатлари футбол конфедерацияси (КОНКАКАФ) ҳам қўшилди. Шу тариқа, ФИФАга нисбатан босим кучайгач, ташкилот баҳсли режасини амалга оширишдан воз кечди.
