Европадаги жазирама туфайли Дунай саёзлашиб қолди – суратлар

Европадаги рекорд даражадаги иссиқ Дунай дарёсида сув сатҳи сўнгги 30 йил ичидаги энг паст даражага тушишига олиб келди. Дарё саёзлашиши нафақат кемачиликка тўсқинлик қилмоқда, балки Венгрия ва Руминиядаги атом электр станциялари ишлашига ҳам таъсир қилмоқда. Бу вақтда Болгарияда олимлар сув сатҳи пасайиши туфайли мамонтлар суякларини топиб олган. Сербияда эса немисларнинг Иккинчи жаҳон уруши даврида, 1944 йилда чўкиб кетган ҳарбий кемалари қолдиқлари сув юзасига чиқиб қолган. Экспертлар баҳолашича, Дунай тубида жами 200 га яқин турлича кемалар, жумладан, буксирчи кемалар ва баржалар ётибди. Улар дарёнинг бир қанча участкаларида кемалар сузишини қийинлаштиради, бу эса юк ташиш кечикишига ва Сербия учун йиллик молиявий йўқотишларга олиб келади. 2024 йилда Евроиттифоқ Дунайни қолдиқлардан тозалаш бўйича лойиҳани йўлга қўйганди. Бу вазифа 2028 йилгача бажарилиши кўзда тутилган. Қуйида саёзлашиб қолган Дунай қандай кўринишда экани акс этган фотосуратлар.