Рейтингнинг 10-ўрнини Санкт-Петербург метросидаги «Площадь Ленина» бекати эгаллаган. У 67 метр чуқурликда жойлашган бўлиб, 1958 йилда фойдаланишга топширилган.

9-ўринда АҚШнинг Портленд шаҳридаги Washington Park бекати қайд этилган. 79 метр чуқурликда жойлашган мазкур бекат Шимолий Америкадаги энг чуқур жамоат транспорти бекати ҳисобланади. Бу ерда эскалаторлар эмас, тезюрар лифтлардан фойдаланилади.

Москва метросидаги «Парк Победы» бекати 84 метр чуқурлик билан 8-ўринни эгаллаган. Бу ерда Европадаги энг узун эскалаторлардан бири ўрнатилган бўлиб, унинг узунлиги 126 метр, саёҳат вақти эса тахминан уч дақиқани ташкил этади.

Санкт-Петербургдаги «Адмиралтейская» бекати 86 метр чуқурликда жойлашган. Унга етиб бориш учун икки босқичли узун эскалаторлардан фойдаланилади.

Киев метросидаги «Университет» бекати 87 метр чуқурликда бўлиб, меъморий безаги билан ажралиб туради. Ҳозирги кунда у бомбапаноҳ сифатида ҳам хизмат қилмоқда.

Хитойнинг Чунцин шаҳридаги Hongtudi бекати 94,47 метр чуқурликда жойлашган. Турли даражаларни боғлаш учун бу ерда 90 дан ортиқ эскалатор ўрнатилган.

Киевдаги машҳур «Золотые ворота» бекати 96,5 метр чуқурликда бўлиб, Европанинг энг чиройли метро бекатларидан бири сифатида тан олинган. Унинг ички қисми Киев Руси даври услубидаги мозаикалар билан безатилган.

Учинчи ўринни яна Киев метросидаги «Арсенальная» бекати эгаллаган. У 105,5 метр чуқурликда жойлашган ва узоқ йиллар давомида дунёдаги энг чуқур метро бекати сифатида эътироф этилган.

Иккинчи ўрин эса КХДР пойтахти Пхенян метросига тегишли. Бу ерда алоҳида бекат эмас, балки бутун метро тизими ўртача 110 метр чуқурликда қурилган. Метро дастлаб ядровий ва бомбадан ҳимоя қилувчи бошпана сифатида лойиҳалаштирилган.

Рейтингда биринчи ўринни Хитойнинг Чунцин шаҳридаги Hongyancun бекати эгаллаган. У ер юзасидан 116 метр чуқурликда жойлашган. Бекат 2022 йилда ишга туширилган бўлиб, 2023 йилда яна бир метро йўналиши уланганидан кейин дунёдаги энг чуқур метро бекатига айланган.

Hongyancun бекатида юқори ва қуйи кириш йўлаклари ўртасидаги баландлик фарқи 141 метрни ташкил этади. Энг юқори кириш қисмидан эскалатор орқали платформага тушиш қарийб саккиз дақиқа вақт олади. Тезюрар лифтлар эса шунчалик тез ҳаракатланадики, айрим йўловчиларда самолёт қўнаётганидаги каби қулоқ битиши ҳисси пайдо бўлади.

2025 йилда мазкур бекат туннелсозлик соҳасидаги халқаро Project of the Year мукофотига сазовор бўлган. Бугунги кунда бу ерда 860 поғонали зинапоя бўйлаб вертикал марафон мусобақалари ҳам ўтказилади.