АҚШ президенти Доналд Трамп Оқ уйда ўтказилган брифингда Украинага қўшимча ҳарбий ёрдам, жумладан Patriot ҳаво мудофааси тизими учун ракета-тўсувчилар ва узоқ масофали ракеталар етказиб бериш масаласига муносабат билдирди.
Журналистларнинг Вашингтон Киевга қўшимча ракеталар юборадими, деган саволига Трамп: «Бизга ўзимизга ҳам ракеталар керак», дея жавоб берди.
Шу билан бирга, у Жо Байден маъмуриятини Украинага кўрсатилган ҳарбий ёрдам сабаб АҚШ қурол-яроғ захираларини жиддий камайтирганликда айблади.
«Байден Зеленскийга 300 миллиард долларлик ўқ-дорилар берди. Мен лавозимдан кетганимда омборлар тўла эди, аммо у уларнинг катта қисмини тарқатиб юборди. Ҳозир биз бу захираларни қайта тиклаяпмиз», — деди Трамп.
Унинг таъкидлашича, АҚШ армияси ҳозир ҳам етарлича қурол-яроққа эга. Президент айрим тизимлар энг замонавий эмаслигини тан олган бўлса-да, улар самарадорлик жиҳатидан етарли даражада эканини қайд этди.
Бу баёнот Украина раҳбарияти ҳаво ҳужумларидан мудофаа қилиш учун Patriot тизимлари ракета-тўсувчиларига эҳтиёж кучайганини яна бир бор таъкидлаган пайтга тўғри келди.
Украина президенти Володимир Зеленский 1 августга ўтар кечаси Россия амалга оширган оммавий ракета ҳужумидан кейин ҳамкор давлатларни ҳаво мудофааси учун ракета захираларини тезроқ етказиб беришга чақирган эди. Унинг таъкидлашича, бу воситалар «кейинги эҳтимолий сценарийлар учун омборларда эмас, балки айнан ҳозир Украинага зарур».
