Қитъа футбол бирлашмалари – УЕФА (Европа), КОНКАКАФ (Шимолий Америка) ва ОФК (Осиё) халқаро футбол ассоциациялари федерацияси (ФИФА) раҳбариятига қарши очиқ хат билан чиқди.
Янги баёнотда футбол бўйича жаҳон чемпионати ҳуқуқларини янги тижорий тузилмага ўтказиш эҳтимоли билан боғлиқ можаро ФИФА иштирокисиз “ташқи экспертлар томонидан мустақил текширув ўтказилишини талаб қилиши” таъкидланган.
“Футбол – сайёрамиздаги энг буюк умумий эҳтирос. У на алоҳида шахсга, на алоҳида ташкилотга тегишли. У ўйинчилар, мухлислар, клублар, миллий ассоциациялар ва унинг келажагини асраш ишониб топширилган ҳар бир муассасага тегишлидир. Айнан шу нуқтаи назардан биз, ўз аъзоларининг вакили бўлган конфедерациялар, бугун ягона мурожаат билан чиқмоқдамиз”, дейилади хатда.
ФИФА ташкилотининг жаҳон чемпионатини кенгайтириш борасидаги барча ютуқларини тан олган ҳолда, етакчи қитъа ташкилотлари раҳбарлари халқаро федерация ўз хатоларини тўлиқ тан олишдан бош тортганини даъво қилмоқда.
“Яқинда ФИФА томонидан вице-президентлар ва 211 та миллий ассоциацияга йўлланган мактубда жараёнда хатоларга йўл қўйилгани тан олинган. Бу алоқадаги узилиш сифатида кўрсатилмоқда, ваҳоланки, аслида футбол бошқарув қарорининг тўлиқ барбод бўлганига гувоҳ бўлди.
Қисқа муддатларда, тегишли маслаҳатлашувларсиз илгари сурилган ва ассоциациялар унинг шартларини тўғри ўрганиб чиққунига қадар муддатга боғлаб қўйилган таклиф эътиборсизлик натижаси эмас – бу назоратни чеклашга қаратилган қасддан қилинган ҳаракат натижасидир.
Хатда таклифнинг ўзи бошиданоқ тубдан нотўғри бўлгани тан олинмаган. Ҳозиргача жаҳон чемпионатидаги улушни сотишга уриниш шунчаки процессуал камчилик эмас, балки ФИФА айнан хизмат қилиши керак бўлган ўша муассасаларнинг ишончига нисбатан чуқур хиёнат ва жиддий муваффақиятсизлик бўлгани англаб етилмаган”, дейилади мактубда.
Хатда ФИФА раҳбариятига қўйиладиган талаблар айтилмаган бўлса-да, мурожаатнинг умумий оҳанги УЕФА, ОФК ва КОНКАКАФ томонидан ташкилотга нисбатан ишонч йўқлигига ишора қилади.
“Булар футбол ўз раҳбариятидан кутадиган фазилатлар эмас. Айнан шунинг учун биз енгилтаклик билан ёки ёлғиз эмас, балки биргаликда – биз хизмат қилаётган ўйин олдидаги бурч ҳисси билан шундай позицияни эгалладик. Футболнинг кучи доим унинг бирлигида бўлган. Биз ушбу бирликни ҳурмат қилишга ва футболга ҳукмронлик қилишга эмас, балки унга хизмат қиладиган раҳбариятни таъминлашга чақирамиз”, – деб якунланади хат.
