Ички ишлар вазирлиги Марказий банк билан ҳамкорликда кибержиноятларга қарши махсус тизим яратган. Бу ҳақда вазирликнинг навбатдаги Ҳайъат йиғилишида айтиб ўтилди.
Вазирлик тизимида 2026 йил “Кибержиноятларга қарши курашиш йили”, деб эълон қилинган ва ушбу йўналишда профилактик тадбирлар кескин кучайтирилган.
Қайд этилишича, Марказий банк билан ҳамкорликда яратилган махсус тизим йўлга қўйилгани натижасида 29 трлн сўм пул ноқонуний равишда четга чиқиб кетишининг олди олинган. Шунингдек, 18 838 та жиноятга алоқадор банк карталари блокланган.
6 ойда жами 9 282 та кибержиноят фош этилган, 4 011 та жиноят ташаббус асосида аниқланган. Бундан ташқари, 13 минг нафардан ортиқ фуқароларга етказилган 120 млрд 496 млн сўмдан зиёд моддий зарар қайтарилган.
Йиғилишда амалга оширилаётган ишлар етарли эмаслиги танқид қилинган. Хусусан, ушбу йўналишда фуқаролардан келиб тушаётган мурожаатларни ҳар томонлама ва пухта ўрганиш, кибержиноятларнинг содир этилиш сабаблари ва уларга имкон бераётган омилларни чуқур таҳлил қилиш зарурлиги таъкидланган.
