«Арсенал» яримҳимояни мустаҳкамлади, «ПСЖ» қанотларни кучайтирмоқда, «Реал» катта футболда тажрибаси бўлмаган, аммо катта истеъдодга эга бўлган ёш ҳужумчилар олди.
Люка Дин
Ёши: 33
Амплуаси: чап қанот ҳимоячиси
Қаердан: «Астон Вилла»
Қаерга: «ПСЖ»
Трансфер қиймати (Transfermarkt маълумоти): 7 миллион евро
Франция миллий жамоаси ҳимоячиси парижликлар клуби билан 2029 йил ёзига қадар амал қилувчи шартнома имзолади. Дин 2013-2015 йилларда ҳам «ПСЖ» клубида ўйнаган, бу давр оралиғида 44 ўйинда майдонга тушиб, бешта голли узатма муаллифи бўлганди. Кейинроқ у «Барселона» ва «Эвертон» клубларида ҳам ўйнади, 2022 йилдан буён «Астон Вилла»нинг асосий таркиб футболчисига айланиб, ушбу жамоа сафида 182 ўйин ўтказди, 4 гол урди ва 24 голга узатма берди. 2025/26 йиллар мавсумида у жамоа билан Европа Лигасида ғолиб чиқди, кейин эса Франция миллий жамоаси сафида 2026 йилги жаҳон чемпионатида қатнашди. Парижда чап қанотда Нуну Мендеш ўйнаши ҳисобга олинса, Люк янги клубида захира футболчиси бўлади.
Трево Чалоба
Ёши: 27
Амплуаси: марказий ҳимоячи
Қаердан: «Челси»
Қаерга: «Комо»
Трансфер қиймати: 30 миллион евро
Хаби Алонсо «Челси» таркибини тозаламоқда ва Чалоба унга кераксиз бўлиб чиқди. Ушбу ҳимоячи ўтган мавсумда барча турнирлар доирасида 47 ўйинда қатнашган ва учта гол ҳам урган. Томас Туҳел уни 2026 йилги жаҳон чемпионати учун таркибга жалб қилди, аммо футболчи захира футболчиси вазифасини ўтади. Энди Трево «Комо» билан 2031 йилга қадар амал қилувчи шартнома тузди – бу икки томон учун ҳам ажойиб келишув бўлди. Футболчи асосий таркибда бўлади ва ЕЧЛда қатнашади, клуб эса тажрибали ҳимоячига эга бўлди.
Бруно Гимарайш
Ёши: 28
Амплуаси: яримҳимоячи
Қаердан: «Нюкасл»
Қаерга: «Арсенал»
Трансфер қиймати: 87,5 миллион евро
Жаҳон чемпионати стартидан олдинроқ бошланган сериал август ойи бошига қадар давом этди. «Арсенал» ниҳоят ҳозирнинг ўзида жамоани кучайтира оладиган тажрибали футболчи билан тўрт йиллик шартнома имзолади. «Нюкасл» сардори бўлган ушбу бразилиялик яримҳимоячи 2025/26 йиллар мавсумида барча турнирлар доирасида 41 ўйинда майдонга тушиб, 9 гол урган ва 8 голга узатма берган. Унинг ЖЧдаги натижаси ҳам ажойиб – беш ўйинда тўрт голли узатма. Гимарайш АПЛ ҳавосини билади ва «Арсенал»га чемпионликни ҳимоя қилишда ёрдам беришга тайёр. «Арсенал» бу трансфер орқали бутун яримҳимоя чизиғини мустаҳкамлади: ушбу футболчи майдонда олтилик (Субименди), саккизлик (Райс) ва ҳатто ўнлик (Эдегор) позицияларида ҳаракатлана олади.
Франко Мастантуоно
Ёши: 18
Амплуаси: вингер
Қаердан: «Реал»
Қаерга: «Фиорентина»
Трансфер қиймати: ижара
Мастантуоно «Ривер Плейт»дан «Реал»га 2025 йил августида келганди, аммо асосий таркибга кира олмади – 2025/26 йиллар мавсумида у Ла лигада 23 ўйинда қатнашиб, атиги битта гол урди. «Фиорентина»га ижара – у кўпроқ ўйин амалиётига эга бўлиши ва тажриба тўплаши учун ажойиб вариант. Италияда Франкони минглаб мухлислар кутиб олишди, улар клубга топ даражадаги футболчи келганига ишонишмоқда – вингер энди уларнинг ҳафсаласини пир қилмаслиги керак бўлади.
Карлос Эспи
Ёши: 21
Амплуаси: ҳужумчи
Қаердан: «Леванте»
Қаерга: «Реал»
Трансфер қиймати: 25 миллион евро
Мадридликлар катта футболда атиги бир мавсум ўтказган ёш футболчи учун катта пул тўлади. Лекин Эспи «Леванте» сафида ўтган мавсумдаги ўйинлари билан эътиборга тушганди. Мавсум ярмида мураббий алмашгач, ўзини кўрсата бошлаган ҳужумчи қолган вақт ичида 11 гол уришга эришди ва 23 ёшгача бўлган футболчилар орасида мавсумнинг энг яхшиси деб топилди. «Реал» уни Моуринионинг талаби билан сотиб олди: чиндан ҳам клубда 194 см бўйга эга ва қанотдан оширилган тўплар учун иккинчи қаватда кураш олиб борадиган ҳужумчи йўқ эди. Клуб унинг қиёфасида янги Ҳоселуга эга бўлди, дейиш ҳам мумкин.
Магнес Аклиуш
Ёши: 24
Амплуаси: ўнг қанот вингери
Қаердан: «Монако»
Қаерга: «ПСЖ»
Трансфер қиймати: 50 миллион евро
«ПСЖ» ички чемпионатдаги рақобатчиларни кучсизлантиришда давом этмоқда. 24 ёшли француз парижликлар билан 2031 йилга қадар амал қилувчи шартнома имзолади. 2025/26 йиллар мавсумида Аклиуш «Монако» сафида 43 ўйинда 7 гол ва 11 голли узатма муаллифи бўлганди. У янги клубида ҳам ўз имконига эга бўлиши аниқ, Луис Энрике асосий вингерларини Чемпионлар лигаси учун асрайди ва мавсум давомида кўп ротация қилади. Бу орада клуб чап қанот учун «Аякс»дан Мика Годтсни трансфер қилиш устида ишламоқда.
Роналд Арауҳо
Ёши: 27
Амплуаси: марказий ҳимоячи
Қаердан: «Барселона»
Қаерга: «Ливерпул»
Трансфер қиймати: ижара
Роналд Арауҳо янги мавсумни Англияда ўтказади. «Ливерпул» ушбу 27 ёшли уругвайликни сотиб олиш ҳуқуқи билан ижарага олди. Инглизлар ижара даври учун пул тўламайди (фақат футболчининг маошини тўлашни тўлиқ ўз зиммасига олади), бир йилдан кейин эса 55 млн еврога сотиб олиш ҳуқуқига эга бўлади. Футболчининг ўзи янги клуби сайтига берган интервюсида бу қарорни фаолиятидаги керакли ва тўғри қарор деб атади. Арауҳо каталонияликлар жамоаси сардори эди, лекин сўнгги мавсумларда кўп жароҳат олди ва «Барселона» асосий таркибидан тушиб қолди, ўтган мавсумда эса қатор омадсиз ўйинлардан кейин тушкунликдан чиқиш учун танаффус олишига ҳам тўғри келди.
Такэҳиро Томиясу
Ёши: 27
Амплуаси: марказий/ўнг қанот ҳимоячиси
Қаердан: «Аякс»
Қаерга: «Кристал Пэлас»
Трансфер қиймати: эркин агент
«Арсенал» собиқ футболчиси «Кристал Пэлас» билан шартнома имзолашдан олдин ҳақиқий кўрикда қатнашишига тўғри келди. Томиясу машғулотлар давомида мураббийларни ишонтира олди ва яна АПЛга қайтадиган бўлди. Япониялик футболчи 2021-2025 йилларда «Арсенал» сафида ўйнаган, аммо жароҳатлар туфайли жамоани тарк этишга мажбур бўлганди. У шу муаммо туфайли «Аякс»да ҳам ўрнашиб қололмади (мавсум давомида атиги етти ўйин), аммо ўзида ирода топа олди ва формасини тиклаб, Япония миллий жамоаси билан ЖЧда муносиб иштирок этди. У энди ўртамиёна клуб сафида фаолиятини қайтадан йўлга қўйишга уриниб кўради.
Эрян Нюланд
Ёши: 35
Амплуаси: дарвозабон
Қаердан: «Севиля»
Қаерга: «Лейпциг»
Трансфер қиймати: эркин агент
Норвегиялик дарвозабон ЖЧда Англияга қарши ўйинда хатоларга йўл қўйган бўлса-да, умуман олганда, турнирни яхши ўтказди. Ҳатто айтиш мумкинки, жамоа унинг сейвлари туфайли чоракфиналгача етиб борди. Бундай иштирок учун эса якунда мукофотга эга бўлди – турнир арафасида шартномаси муддати тугагани учун «Севиля»дан кетган футболчига топ-чемпионат клубидан таклиф берилди. «Лейпциг» Гулачини «Вилярреал»га қўйиб юборди ва Нюланни Германияга қайтарди (у 2022/23 йиллар мавсумида ҳам жамоада бўлган). Эрян клуб билан 2028 йилга қадар шартнома тузди.
Олтой Байиндир
Ёши: 28
Амплуаси: дарвозабон
Қаердан: «Манчестер Юнайтед»
Қаерга: «Селта»
Трансфер қиймати: ижара
Ушбу дарвозабон 2023 йилда «Манчестер Юнайтед»га қўшилиб, ушбу инглиз клуби тарихидаги илк турк футболчиси бўлганди. Андре Онананинг қўпол хатолари туфайли у асосий таркибда ўйнаш имкониятини қўлга киритди, аммо бу имкониятдан тўлиқ фойдалана олмади. У ҳам бир неча бор қовун туширди, бу эса янги дарвозабон сотиб олинишига сабаб бўлди. Ўтган мавсумда Ламменс клубда асосий дарвозабон мақомини тўлиқ ўзиники қилди, туркиялик посбон эса захирада ўтиришни истамади ва Испанияни забт этиш учун йўл олди.
Жеймс Траффорд
Ёши: 23
Амплуаси: дарвозабон
Қаердан: «Манчестер Сити»
Қаерга: «Лидс»
Трансфер қиймати: 46,7 миллион евро
Траффордга ўтган ёзда жонажон клубида асосий таркибни ваъда қилиб олиб келишганди, аммо Доннарумма трансферидан кейин барчаси ўзгариб кетди. Натижада 2025/26 йиллар мавсумида ушбу дарвозабон «Манчестер Сити» сафида барча турнирлар доирасида 17 ўйинда майдонга тушиб, 13 гол ўтказиб юборди, шу билан бирга, 8 ўйинда дарвозаси дахлсизлигини сақлаб қолди. Ғолиблик билан якунланган Англия кубоги ва Англия лигаси кубоги ўйинларида асосий дарвозабон бўлди. Пеп Гвардиола ўрнига келган Энцо Мареска ҳам Жанлуиджига ишонишга қарор қилди, Траффорд эса яна бир мавсумни захира ўриндиғида ўтказишни истамади, якунда клуб ўз тарбияланувчисини иккинчи бор сотиб юборди. Энди Жеймс «Лидс» сафида асосий дарвозабон бўлади.
Ян Диоманде
Ёши: 19
Амплуаси: вингер
Қаердан: «Лейпциг»
Қаерга: «Реал»
Трансфер қиймати: 125 миллион евро
Мадридликлар ушбу ивуарлик трансфери учун 125 миллион евро тўлайди, аммо «Лейпциг» яна 15 миллион еврони бонуслар кўринишида олиши мумкин. Эътиборли жиҳати, ушбу вингер немислар клубида атиги бир мавсум ўтказганди: у 36 ўйинда 13 гол урди ва 10 голга узатма берди. «Лейпциг» ўтган ёзда уни «Леганес»дан 20 миллион еврога сотиб олганди. Энди Диоманде ўз дриблинги билан мухлисларни хурсанд қилиш ва «Қироллик клуби» ўнг қанотида жавлон уриш учун Испанияга қайтди.
Муҳаммад Салоҳ
Ёши: 34
Амплуаси: вингер
Қаердан: «Ливерпул»
Қаерга: «Трабзонспор»
Трансфер қиймати: эркин агент
34 ёшли мисрлик ҳужумчи «Трабзонспор» билан икки йиллик шартнома имзолади. Салоҳ «Ливерпул» билан шартномаси якунлангач, эркин агентга айланганди. Ушбу футболчи ўйинида чемпионлик мавсумидан кейин пасайиш юзага келганди: у ўтган мавсумда барча турнирлар доирасида 41 ўйинда майдонга тушиб, 12 гол урди ва 10 голга узатма берди. Мавсум ярмида эса мураббий Арне Слот билан жанжаллашиб қолди. Аммо унинг салоҳияти ҳали Туркия чемпионатининг асосий юлдузларидан бири бўлиш учун етарли.
Марк-Андре тер Штеген
Ёши: 34
Амплуаси: дарвозабон
Қаердан: «Барселона»
Қаерга: «Аякс»
Трансфер қиймати: ижара
«Барселона»нинг асосий дарвозабони бўлиш учун талабларга жавоб бермай қолган тер Штеген 2026 йил январида ижара асосида «Жирона»га ўтганди, аммо икки ўйиндан кейин тиззасидан жароҳат олди ва мавсумнинг қолган қисмини ўтказиб юборди. «Аякс»га ижара – футболчи учун карьерасини қайтадан йўлга қўйиш учун яна бир имкон. Асосийси, жароҳат олмаслик.
Гонсало Гарсия
Ёши: 22
Амплуаси: ҳужумчи
Қаердан: «Реал»
Қаерга: «Фулҳэм»
Трансфер қиймати: 40 миллион евро
«Реал»нинг собиқ футболчиси ва собиқ бош мураббийи Алваро Арбелоа Англияда испанлар колониясини ташкил этмоқда. Унинг ортидан 22 ёшли испаниялик ҳужумчи ҳам АПЛга йўл олди ва «Фулҳэм» билан 2031 йилга қадар амал қилувчи шартнома тузди. Гарсия – «Реал» академияси тарбияланувчиси, лекин аввал ҳам кўплаб иқтидорли ёшлар билан бўлганидек, у ҳам асосий таркибга кира олмади. Гонсало мадридликлар сафида сўнгги икки мавсумда 51 ўйинда майдонга тушиб, 13 гол урди ва 5 голга узатма берди. Энди у ўз кучини Англия чемпионатида синаб кўради (Арбелоа даврида мадридликлар сафида ўйнаган яна бир футболчи, 21 ёшли яримҳимоячи Сесар Паласиос ҳам 10 млн евро эвазига «Фулҳэм»га трансфер қилинган).
Дэнни Уэлбек
Ёши: 35
Амплуаси: ҳужумчи
Қаердан: «Брайтон»
Қаерга: «Челси»
Трансфер қиймати: 5,85 миллион евро
Ҳаби Алонсо «Челси»нинг ёш таркибига бироз тажриба қўшишга қарор қилди. Англиянинг қатор клубларида, жумладан, «МЮ» ва «Арсенал»да ҳам ўйнаган тажрибали ҳужумчи Дэнни Уэлбек энди «Челси»да. У 2025/26 йиллар мавсумида «Брайтон» сафида 40 ўйинда майдонга тушиб, 14 гол урди ва 2 голга узатма берди. Лондон клубида Дэнни асосий таркиб футболчиси бўлмайди, аммо унинг ўзи бунга қарши эмас, чунки у захирадан ўйинга қўшилиб ҳам самарали ҳаракат қилиши мумкин. Ушбу инглиз ҳужумчиси АПЛ ўйинларида захира ўриндиғидан майдонга тушиб, 19 гол уришга эришган. У бу борада фақат Оливе Жиру (21) ва Жермейн Дефо (24)дан ортда қолади.
Жордан Ҳендерсон
Ёши: 36
Амплуаси: яримҳимоячи
Қаердан: «Брентфорд»
Қаерга: «Челси»
Трансфер қиймати: эркин агент
Яна бир тажрибали футболчи «Челси»га ўтди. Ҳендерсон ўтган мавсумда «Брентфорд» сафида барча турнирлар доирасида 34 ўйинда майдонга тушиб, бир гол урди ва уч голга ассист берди. Томас Туҳел ҳам уни кийим алмаштириш хонасидаги тартибга жавоб бериши учун жаҳон чемпионатига олиб борганди, энди Алонсо ҳам ундан шу мақсадда фойдаланмоқчи («Челси» ушбу икки тажрибали футболчи қўшилганидан кейин ҳам АПЛнинг ўртача ёш бўйича энг ёш таркибига эга). У ва Уэлбек энди лондонликлар жамоасидаги интизом учун масъул бўлади.
Рандал Коло Муани
Ёши: 27
Амплуаси: ҳужумчи
Қаердан: «ПСЖ»
Қаерга: «Ювентус»
Трансфер қиймати: 41,2 миллион евро
Коло Муани олдин ҳам, 2024/25 йиллар мавсумининг иккинчи қисмида «Ювентус» сафида ўйнаганди. Ўшанда ушбу француз форварди 22 ўйинда 10 гол уриб, 3 голли узатма муаллифига айланган, аммо мавсум якунида клублар тўлақонли трансфер бўйича келиша олмаганди. 2025/26 йиллар мавсумини форвард «Тоттенҳэм» сафида ижара асосида ўтказиб, 41 ўйинда 5 гол уриш ва 4 та голли узатма бериш билан чекланди. Натижада унинг трансфер нархи тушди ва «Юве» бундан фойдаланиб, яна «ПСЖ»га мурожаат қилди – бу сафар клублар келиша олишди. 2023 йилда парижликлар клуби Коло Муанини «Айнтрахт»дан 95 миллион еврога харид қилишганди, энди икки баробар арзонроққа сотишга мажбур бўлишди.
Керим Алайбегович
Ёши: 18
Амплуаси: ҳужумчи
Қаердан: «Байер»
Қаерга: «Ювентус»
Трансфер қиймати: 32 миллион евро
2025/26 йиллар мавсумидан олдин «Байер» Алайбеговични «Залцбург»га сотганди, аммо кейин келишувдаги тегишли бандни ишга тушириб, уни яна ўзига қайтарди. Ушбу косоволик ёш вингер австрияликлар жамоасида ўтган мавсумда 44 ўйинда майдонга тушиб, 13 гол урди ва 4 пас муаллифи бўлди. Жаҳон чемпионатида эса ёрқин ўйин кўрсатиб, Қатар дарвозасига ғалаба голини урди. Натижада немислар унинг трансферидан мўмайгина пул ишлаб олишди, энди ушбу футболчи «Ювентус» мухлисларини ўзининг сермаҳсул ўйинлари билан хушнуд этиши талаб қилинади.
Возиня
Ёши: 40
Амплуаси: дарвозабон
Қаердан: «Шавиш»
Қаерга: «Коло-Коло»
Трансфер қиймати: эркин агент
Жаҳон чемпионатидан кейин ушбу дарвозабоннинг Transfermarkt порталидаги нархи 10 бараварга ошди – 50 мингдан 500 минг еврога. Унинг инстаграмдаги обуначилари сони эса кескин кўтарилди – 50 мингдан 30 миллионга. Футболчи фаолиятининг сўнгги даврида бўлганига қарамай, клублардан қизиқиш ҳам ўсди. Ҳолбуки жаҳон чемпионатига қадар Кабо-Верде дарвозабони «Шавиш» билан шартномаси муддати тугагани туфайли, клубсиз қолганди. Якунда 40 ёшли дарвозабонни Чилининг «Коло-Коло» клуби ўз сафига қўшиб олди, бу ерда Возиняни минглаб мухлислар кутиб олишди, унга стадионда клуб футболкасини осмондан тушиб келган парашютчи олиб келди. Бу трансфер Чили чемпионатига бўлган қизиқишни ҳам оширса, ажаб эмас.
