Қонунчилик палатаси депутатлари шаҳарсозлик соҳасида қонунчилик талабларига риоя этилишини таъминлаш ва ноқонуний қурилишларнинг олдини олишга қаратилган қонун лойиҳасини кўриб чиқди.
Ҳужжат билан Шаҳарсозлик кодекси ҳамда «Лицензиялаш, рухсат бериш ва хабардор қилиш тартиб-таомиллари тўғрисида»ги қонунга қатор ўзгартириш ва қўшимчалар киритиш назарда тутилмоқда.
Хусусан, шаҳарсозлик талабларини қўпол равишда бузиш, ноқонуний қурилишларни амалга ошириш, шунингдек, қурилиш-монтаж ишларини бош режа, мастер-режа ва қурилиш лойиҳаси талабларига зид равишда олиб борганлик учун жавобгарлик чоралари кучайтирилмоқда.
Шунингдек, қонунчиликда белгиланган ҳажмдан катта иморатлар, бино ва иншоотларни ваколатли органни хабардор қилмасдан қуриш, реконструкция қилиш ёки капитал таъмирлаш учун ҳам жавобгарликни кучайтириш кўзда тутилган.
Қонун лойиҳасида Урбанизация ва уй-жой бозорини барқарор ривожлантириш миллий қўмитасининг шаҳарларни комплекс ривожлантириш соҳасидаги ваколатларини аниқ белгилаб қўйиш ҳам назарда тутилмоқда.
Депутатларнинг қайд этишича, ҳужжатнинг қабул қилиниши шаҳарсозлик соҳасининг ҳуқуқий асосларини мустаҳкамлаш, ноқонуний қурилишларни қисқартириш ва қурилиш бозорида ҳалол рақобат муҳитини таъминлашга хизмат қилади. Шу билан бирга, ер ва кўчмас мулк ресурсларидан самарали фойдаланиш учун ҳуқуқий механизмларни такомиллаштириш кўзда тутилган.
Қонун лойиҳаси фуқароларнинг кўп квартирали уйлар қурилишига йўналтираётган маблағларини ҳимоя қилиш, шунингдек, аҳоли учун урбанизация тамойилларига асосланган хавфсиз ва замонавий шаҳар муҳитини шакллантиришга ҳуқуқий замин яратиши кутилмоқда.
Муҳокамалар якунида қонун лойиҳаси депутатлар томонидан биринчи ўқишда қабул қилинди.
