Ferrari эксклюзив Special Projects дастури доирасида америкалик мижознинг индивидуал буюртмаси асосида навбатдаги автомобилни яратди. Янгилик CZ26 деб номланди: 26 рақами бу лойиҳа доирасида ишлаб чиқарилган 26-ноёб автомобил эканини билдиради.
CZ26’нинг асосини Ferrari SF90 ташкил этади, бироқ асл моделдан деярли ҳеч қандай таниш кузов элементи қолмаган. Олд қисми баландроқ ва бурчаклироқ бўлган, кузов чизиқлари эса аниқроқ ва геометрик кўриниш олган. Одатий SF90 фаралари ўрнини олд панжаранинг бутун эни бўйлаб жойлашган ингичка ёруғлик элементлари эгаллаган.
Дизайнерлар автомобилнинг орқа қисми кўринишини ҳам бутунлай қайта ишлади. Тор чироқлар ўрнига йирик квадрат шаклидаги блоклар ўрнатилган, марказдаги қўшалоқ тутун чиқариш қувурлари эса сақлаб қолинган. Бампернинг ўзига хос V шакли ҳам йўқолиб, унинг ўрнида янги диффузорли, янада горизонтал пастки қисм пайдо бўлган.
Ferrari вакилларининг сўзларига кўра, CZ26’ни яратишда 1970 йиллардаги Италия саноат дизайнидан илҳомланилган. Шу билан бирга, автомобил ретро услубдан кўра кўпроқ футуристик кўринишга эга бўлди ва унинг баъзи ечимлари ҳақиқатан ҳам айрим замонавий концепт-карларни ёдга солади.
SF90’нинг техник жиҳозлари деярли ўзгаришсиз қолган. Карбон кузов остида иккита турбокомпрессорли 4,0 литрли V8 двигатели ва учта электр мотор ишлайди, уларнинг умумий қуввати 986 от кучини ташкил этади. CZ26 жойидан 100 км/соат тезликка 2,5 сонияда эришади, максимал тезлиги эса соатига 328 км га тенг.
Салон ҳам SF90 архитектурасини сақлаб қолган, аммо янги мато ва карбон элементлар билан бойитилган. Шу билан бирга, кузовдаги ўзгаришлар жиддий муҳандислик ишларини талаб қилди: Ferrari совутиш тизими, автомобил туби, уюрма генераторлари, олд ҳаво пардалари, орқа спойлер ва диффузорни қайта ишлаб чиқди.
Ferrari CZ26’нинг нархини ошкор қилмаяпти. Special Projects автомобилларини яратишга тахминан икки йил вақт кетади ва бу жараёнда буюртмачи барча босқичларда бевосита иштирок этади. Шу сабабли, бундай индивидуал Ferrari’нинг нархи миллионлаб долларга етиши мумкин.
