Интернетда Хитойдаги Goldin Finance 117 осмонўпар биносининг қурилиш жараёни акс этган янги суратлар тарқалди. Баландлиги 597 метр бўлган ушбу улкан иншоот ҳозирда дунёдаги энг баланд битказилмаган осмонўпар бино сифатида қайд этилмоқда.

Goldin Finance 117 қурилиши 2008 йилда бошланган. Дастлабки режага кўра, у Хитойдаги энг баланд осмонўпар бино бўлиши керак эди. Мажмуа 117 қаватдан иборат қилиб лойиҳалаштирилган.

Бино қурилишида кучли шамол ва зилзилаларга чидамлиликни ошириш мақсадида «мегаколонналар» деб аталувчи йирик конструкциялардан фойдаланилган.

Осмонўпар бино ташқи кўриниши билан ҳам ажралиб туради. Унинг шакли ҳассани эслатади, юқори қисмида эса ромбсимон конструкция барпо этилиши режалаштирилган. У ерда атриум, бассейн ва шаҳарни юқоридан томоша қилиш имконини берувчи кузатув майдончаси жойлашиши керак.

P&T Group архитектура компанияси лойиҳасига кўра, бинонинг юқори қаватларида офислар ва беш юлдузли меҳмонхона ташкил этиш режалаштирилган.

Қурилиш нега қарийб 10 йилга тўхтаб қолган?

2015 йилда Хитой фонд бозоридаги кескин пасайишдан кейин Goldin Finance 117 қурилиши тўхтатилган. Молиявий инқироз лойиҳани амалга ошираётган Гонконгнинг Goldin Properties Holdings компанияси келажагини ҳам савол остида қолдирган.

Компания асосчиси Пан Сутун бир вақтлар Гонконгнинг энг бой тадбиркорларидан бири ҳисобланган. Кейинчалик эса Goldin Properties Holdings ликвидация жараёнигача етиб борган.

Натижада деярли тайёр ҳолатга келган улкан осмонўпар бино йиллар давомида битказилмай қолган.

Манбада қайд этилишича, Goldin Finance 117 қурилиши ўтган йил баҳорида яна тикланган. Энди объектни жорий йил охирига қадар тўлиқ битказиш режалаштирилмоқда.

Хитойдаги 500 метрлик чеклов унга таъсир қилмайди

Goldin Finance 117 яна бир жиҳати билан алоҳида аҳамиятга эга. Хитойда кейинчалик баландлиги 500 метрдан ошадиган янги бинолар қурилишига чекловлар жорий қилинган.

Бироқ Goldin Finance 117 ушбу талаблар кучга киришидан олдин 500 метрлик чегарадан ошиб бўлгани сабабли унинг қурилишини давом эттириш мумкин.

Шу тариқа, у Хитойда 500 метрлик чегарадан юқори бўлган сўнгги осмонўпар бинолардан бири бўлиб қолиши мумкин.

Энди Хитойда учинчи ўрин билан чекланади

Қурилишнинг узоқ вақт тўхтаб қолиши Goldin Finance 117'нинг осмонўпар бинолар рейтингидаги ўрнига ҳам таъсир қилди.

Лойиҳа бошланган вақтда у Хитойнинг энг баланд биноси бўлиши кутилган эди. Аммо қурилиш тўхтаб турган йилларда Шанхай минораси ва Шэнчжэн шаҳридаги Ping An Finance Center ундан ўзиб кетди.

Шу сабаб Goldin Finance 117 қуриб битказилганидан кейин баландлиги бўйича Хитойда учинчи, дунёда эса олтинчи ўринга даъвогар бўлади.

Бироқ ўн йиллик охирига қадар яна икки улкан лойиҳа — Саудия Арабистонидаги бир километр баландликдаги Jeddah Tower ва Дубайдаги Burj Azizi қурилиши якунланса, Goldin Finance 117 жаҳон рейтингида саккизинчи ўринга тушиши мумкин.

Шундай қилиб, қарийб ўн йил давомида қурилиши тўхтаб турган Goldin Finance 117 Хитой кўчмас мулк бозоридаги муаммолар рамзидан тўлақонли бизнес марказига айланиш арафасида.