19 август кунги савдоларда Американинг Moderna биотехнология компанияси акциялари 159,57 фоизга қимматлашиб, энг юқори чўққисида 163,43 долларга етди. Бу ҳақда NASDAQ биржаси маълумотлари дарак бермоқда.
Bloomberg нашрининг ёзишича, котировкалар Moderna ва Merck фармацевтика компанияси томонидан ишлаб чиқилган вакцина йирик клиник синовлар давомида меланоманинг сўнгги босқичларида касаллик қайталаниши ҳолатларини камайтиришга ёрдам бергани ҳақидаги хабарлар фонида ўсмоқда. Бу беморнинг умрини узайтириш имконини берувчи ушбу саратон турини даволаш усулининг пайдо бўлишига умидни кучайтирди.
Компаниянинг маълум қилишича, синов ўзининг асосий мақсадига эришган: вакцина Merck компаниясининг Кейтруда иммунопрепарати билан биргаликда қўлланилганда, меланома қайталаниши ҳолатларини фақат иммунотерапиянинг ўзига қараганда кўпроқ камайтиришини намойиш этган. Шунингдек, тадқиқот яна бир мақсадга — саратоннинг тана бўйлаб янги аъзоларга тарқалишини секинлаштиришга ҳам эришди.
Меланома — теридаги пигмент ҳосил қилувчи меланоцит ҳужайраларидан ривожланадиган хавфли ўсма. У тез ўсиши ва бошқа аъзоларга метастаза бериши мумкин. Янги пайдо бўлган ёки шакли, ранги, ўлчами ўзгараётган холлар меланомадан шубҳаланишга асос бўлади. Эрта аниқлаш даволаш самарадорлигини оширади.
