АҚШ президенти Доналд Трамп 20 август, пайшанба куни Эронга қарши кенг кўламли иқтисодий операция бошланганини эълон қилди. Бу ҳақда у ўзининг Truth Social ижтимоий тармоғида ёзди.
«Бугун мен бирор давлатга қарши қачондир амалга оширилган энг вайронкор иқтисодий операция бошланганини эълон қиламан. Бу мисли кўрилмаган кўламдаги иқтисодий уруш ва изоляция бўлади», — дея таъкидлади Трамп.
Шу билан бирга, АҚШ раҳбари Эронни қўллаб-қувватлайдиган ёки у билан иқтисодий ҳамкорликни давом эттирадиган давлатларга нисбатан кескин чоралар кўрилишини билдирди. Унинг сўзларига кўра, бундай мамлакатлар «улкан» санкцияларга дуч келиши мумкин.
Трамп Вашингтоннинг иттифоқчиларини ҳам Теҳронга қарши иқтисодий босим кампаниясига қўшилишга чақирди.
«Эрон таҳдидини яккалаш ва уни енгиш учун барча иттифоқчиларимизнинг қўллаб-қувватлаши керак», — деди АҚШ президенти.
АҚШ бунга қадар ҳам Эрон иқтисодиётининг муҳим тармоқларига қарши кенг қамровли санкциялар жорий этган эди. Хусусан, чекловлар нефт саноати, денгиз орқали юк ташиш ва молия секторларини қамраб олган. Вашингтоннинг асосий мақсадларидан бири Теҳроннинг энергия ресурслари экспортидан оладиган даромадларини кескин қисқартириш ҳисобланади.
Трамп эълон қилган янги чоралар АҚШ апрел ойи бошида маълум қилган «Иқтисодий ғазаб» операцияси доирасидаги босим кампаниясининг давоми бўлиши мумкин.
Айни пайтда Эрон билан иқтисодий алоқаларни чеклаш бўйича айрим давлатлар ҳам чора кўра бошлаган. Хусусан, Бирлашган Араб Амирликлари 18 август куни Эрон билан барча савдо-сотиқ, тижорий алмашинувлар ва молиявий операцияларни кейинги хабарга қадар тўхтатишини эълон қилди.
БАА расмийлари бу қарорни Теҳрон томонидан мамлакат йўналишида иккита ракета учирилгани ҳақидаги даъволар билан изоҳлади. Амирликлар томонига кўра, ҳужумдан кўзланган мақсад денгиз қатновига таҳдид солиш бўлган.
Эрон эса БАА томонидан билдирилган ушбу айбловларни рад этди.
