Die Wirtschaftswoche ишбилармонлик журнали маълумотига кўра, Германия компанияларига АҚШга аввал тўланган 790 млн евродан зиёд божхона тўловлари қайтарилган.
Маблағларни қайтаришга 2026 йил феврал ойида АҚШ Олий судининг Доналд Трамп маъмурияти томонидан жорий этилган қўшимча тарифларни ноқонуний деб топгани асос бўлган.
Немис компаниялари орасида энг катта маблағни DHL олган — унга 416 млн евро қайтарилган. Логистика компанияси ушбу маблағларни ўз мижозларига қайтаришни режалаштирмоқда.
Тиббий ускуналар ишлаб чиқарувчи йирик компаниялардан бири Siemens Healthineers 200 млн евродан сал кўпроқ маблағни қайтариб олган. Спорт кийимлари ва пойабзаллари ишлаб чиқарувчи Pumaʼга 49 млн евро, лаборатория ускуналари ишлаб чиқарувчи Sartoriusʼга 26 млн евро тўланган.
Тиббий ускуналар ва шахсий ҳимоя воситалари ишлаб чиқарувчи Dräger эса АҚШдан 22 млн евро божхона тўловларини қайтариб олган.
Die Wirtschaftswoche қайд этишича, ҳозиргача қайтарилган 790 млн евродан ортиқ маблағ якуний рақам эмас. Айрим Германия компаниялари ҳали компенсация олмаган ва тўловлар 2026 йил охиригача амалга оширилишини кутмоқда.
Хусусан, Adidas 214 млн евродан 257 млн еврогача маблағни қайтариб олишни режалаштирмоқда. DHL ҳам қўшимча компенсация олишни кутмоқда.
Умуман, АҚШ ҳукумати 2025 йил октябридан 2026 йил июль ойи охирига қадар хорижий компанияларга қарийб 85 млрд евро божхона тўловларини қайтарган. АҚШ божхона хизмати баҳоларига кўра, яна 25 млрд евродан ортиқ маблағ қайтарилиши керак.
Таққослаш учун, 2024 йил октябридан 2025 йил июн ойи охиригача Вашингтон хорижий компанияларга 4,5 млрд евродан сал камроқ маблағ қайтарган эди.
2026 йил 20 февралда АҚШ Олий суди Трамп ўнлаб савдо ҳамкорларига, жумладан Европа Иттифоқи давлатларига кенг кўламли божлар жорий этишда президентлик ваколатларидан четга чиққан, деган қарорга келган.
Трамп тарифларни жорий этишда 1977 йилда қабул қилинган Халқаро фавқулодда иқтисодий ваколатлар тўғрисидаги қонунга (IEEPA) таянган эди. Суд эса деярли барча мамлакатлардан импорт қилинадиган товарларга белгиланган «ўзаро» тарифлар, шунингдек, Канада, Мексика ва Хитой товарларига қўйилган 25 фоизлик божларни ноқонуний деб топган.
Трамп Олий суд қарорини кескин танқид қилиб, уни «чуқур хафсала пир қилувчи» қарор деб атаган.
Шундан сўнг Трамп 10 фоизлик янги божларни жорий қилган. Бироқ май ойида Ню-Йоркдаги АҚШ Халқаро савдо масалалари бўйича федерал суди бу тарифларни ҳам ноқонуний деб топган.
