У ҳужжатни Оқ уйда журналистлар иштирокида имзолади. Жараён Оқ уй томонидан трансляция қилинди.
Трампнинг айтишича, янги ном зудлик билан кучга киради. Журналистлардан бири президентдан кўлни қайта номлаш орқали Канадага қандай ишора бермоқчи эканини сўради. «Ҳеч қандай», — деб жавоб берди Трамп.
Онтарио кўли – Шимолий Америкадаги бешта Буюк кўлдан бири бўлиб, Канада ва АҚШ чегарасида жойлашган. У Буюк кўллар ичида энг шарқда жойлашгани ва майдони жиҳатидан энг кичиги ҳисобланади: унинг майдони қарийб 19 минг кв. км, ўртача чуқурлиги – 86 м, энг чуқур нуқтаси эса тахминан 244 м. Канаданинг марказидаги энг аҳолиси зич ва иқтисодий ривожланган провинция ҳам шу кўл номи билан аталади.
Америка етакчиси кўлни қайта номлаш режаси ҳақида икки кун аввал ўзининг Truth Social ижтимоий тармоғида хабар берган эди. Унинг сўзларига кўра, бу АҚШнинг Онтарио билан бизнес юритишни давом эттириш ниятида эмаслиги билан боғлиқ. Ўшанда АҚШ президенти Канада раҳбариятини «масхарабозлар» деб атаб, агар Оттава Вашингтонга нисбатан ҳозирги сиёсатини давом эттирса, бу оқибатларга олиб келиши билан таҳдид қилган.
Бундан сал аввал Трамп 2027 йил январь ойидан бошлаб Канададан келтириладиган барча енгил ва юк автомобилларига, автомобиль эҳтиёт қисмларига ҳамда пўлатга 50 фоизлик бож жорий этилишини эълон қилганди.
Трамп 2025 йил 20 январида, ўзининг иккинчи президентлик муддатининг биринчи кунида Мексика кўрфазини (Gulf of Mexico) Америка кўрфази (Gulf of America) деб қайта номлаш тўғрисида фармойиш имзолаган эди. Ушбу қарор кўрфаз номининг АҚШ федерал органлари томонидан расман қўлланилишига татбиқ этилади.
Шу билан бирга, Трамп бутун сув ҳавзасининг халқаро номини бир томонлама ўзгартира олмади. Мексика, кўплаб халқаро ташкилотлар ва ОАВ сингари, «Мексика кўрфази» номидан фойдаланишда давом этмоқда.
