Онтарио — АҚШ ва Канада ҳудудида жойлашган бешта Буюк кўлнинг энг кичиги. Трамп 27 август куни Оқ уйда унинг номини ўзгартириш ҳақидаги фармонни имзолаган.

«Биз Онтарио кўли номини дарҳол “Америка кўли” деб ўзгартиряпмиз», — деди АҚШ президенти журналистларга.

Трамп бу қарорини «Канада расмийлари АҚШ вакилларига жуда ёмон муносабатда бўлгани» билан изоҳлаган.

Канада бош вазири Марк Карни эса бунга кескин муносабат билдирди. У Онтарио номи 400 йилдан ортиқ тарихга эга эканини, бу ном Канада Конфедерацияси ташкил этилиши ва АҚШ Мустақиллик декларацияси қабул қилинишидан анча олдин пайдо бўлганини таъкидлади.

«Биз Америка ўзгараётганини биламиз. Унинг савдо алоқалари, ташқи сиёсати, миллий ёдгорликлари ва ҳатто географик сув объектларининг номлари ҳам ўзгармоқда. Канадаликлар эса нарсаларни ўз номи билан аташ кераклигини билади — бу Онтарио кўли. Шундай бўлган, ҳозир ҳам шундай ва доимо шундай бўлиб қолади», — деб ёзди Карни X ижтимоий тармоғида.

Қарор савдо келишмовчилиги ортидан қабул қилинди

Трамп Онтарио кўлини қайта номлаш режасини илк бор 25 август куни маълум қилган эди. Бу АҚШ ва Канада ўртасида янги савдо битими бўйича музокаралар натижасиз якунланганидан кейин содир бўлди.

Музокаралар барбод бўлгач, АҚШ Канаданинг бир қатор товарларига 50 фоиз миқдорида божхона божларини жорий қилди. Улар орасида мебел, сут маҳсулотлари, цемент, кийим-кечак, балиқ овлаш анжомлари ва ҳоккей жиҳозлари бор.

Шундан сўнг Марк Карни ҳам АҚШнинг бир қатор маҳсулотларига 50 фоизгача жавоб тарифлари жорий этилишини эълон қилди. ОАВ маълумотларига кўра, чекловлар сут саноати, металлургия, маиший техника, целлюлоза-қоғоз саноати ва электроника каби соҳаларни қамраб олади. Янги тарифлар 8 сентябрдан кучга кириши кутилмоқда.

Томонлар савдо битими имзоланмай қолгани учун бир-бирини айбламоқда. Карнининг айтишича, АҚШ музокараларнинг «сўнгги дақиқасида» келишув шартларига ўзгартишлар таклиф қилган ва улар «адолатсиз, бозор тамойилларига зид» бўлган.

АҚШ савдо вакили Жеймисон Грир эса Оттава аввалроқ келишилган шартлар асосида савдо битимини якунийлаштиришдан бош тортганини айтган.

Трамп географик объектларни қайта номлаш ташаббуслари билан бир неча бор чиққан