АҚШ президенти Доналд Трамп 29 август куни Truth Social ижтимоий тармоғида Вашингтон ва Венесуэла ўртасида йирик нефт битими тузилганини эълон қилди.
Трампнинг таъкидлашича, келишув натижасида АҚШ Жанубий Америка мамлакатининг нефт захираларининг бешдан бир қисми устидан назоратга эга бўлади.
«Ушбу тарихий битим Американинг нефт захираларини икки баравардан ҳам кўпроқ оширади, нефт таъминотимизни сезиларли даражада кенгайтиради ва барча америкаликлар учун бензин нархини узоқ йилларга жиддий пасайтиради», — дея ёзган Трамп.
АҚШ президенти келишувнинг батафсил шартларини очиқламаган.
Гап 65 млрд баррелдан ортиқ нефт ҳақида кетмоқда
Трампнинг маълум қилишича, АҚШ Венесуэладаги 65 млрд баррелдан ортиқ тасдиқланган нефт захиралари устидан назорат олади. Унинг сўзларига кўра, бу хусусий компаниялар билан ҳамкорлик орқали амалга оширилади ва америкалик солиқ тўловчилар учун ҳеч қандай харажат талаб қилмайди.
Трамп битимни имзолаш жараёнида АҚШ давлат котиби Марко Рубио, мудофаа вазири Пит Ҳегсет ва Венесуэланинг муваққат президенти Делси Родригес иштирок этганини билдирди.
Сўнгги бир неча ҳафта давомида Вашингтон ва Каракас Америка компанияларига Венесуэладаги қатор нефт конларидан узоқ муддат фойдаланиш имкониятини бериш масаласида музокаралар олиб борган. Бундан кўзланган мақсад қазиб олинадиган хом нефтнинг АҚШга барқарор етказиб берилишини таъминлаш бўлган.
Венесуэла дунёдаги энг йирик тасдиқланган нефт захираларига эга мамлакат ҳисобланади. Бироқ кўп йиллик инвестиция танқислиги, самарасиз бошқарув ва санкциялар сабаб мамлакатнинг нефт қазиб олиш ҳажми мавжуд захираларига нисбатан анча паст даражада қолмоқда.
Маълумотларга кўра, ҳозир Венесуэлада кунига тахминан 1,25 млн баррель нефт қазиб олинади.
Ҳозирча Венесуэла томони Трамп эълон қилган келишув шартлари ва АҚШнинг 65 млрд баррелдан ортиқ нефт захиралари устидан назорати қандай механизм асосида амалга оширилиши ҳақида батафсил маълумот бермаган.
