Скотт Бессент ва Антон Силуанов АҚШнинг Шимолий Каролина штатидаги Ашвилл шаҳрида бўлиб ўтган G20 мамлакатлари молия вазирлари ва Марказий банк раҳбарлари учрашуви доирасида музокара Фото: Sam Wolfe/REUTERS
.
Reuters 1 сентябрга ўтар кечаси музокара мазмунидан хабардор манбага таяниб ёзишича, Бессент Силуановга Россия Украинадаги уруш тугамагунча иқтисодий босимнинг юмшатилишини кутмаслиги кераклигини билдирган.
Шунингдек, Вашингтон уруш якунлангунига қадар бошқа масалалар бўйича ҳам Москва билан алоҳида келишувлар тузиш ниятида эмаслиги айтилган.
Силуановнинг G20 доирасидаги учрашувда иштирок этиши айрим Европа давлатлари вакилларининг эътирозига сабаб бўлган. Reuters қайд этишича, Европа мамлакатлари айни пайтда Украинадаги уруш туфайли Россияга нисбатан санкцияларни кучайтириш устида ишламоқда.
Хусусан, Германия молия вазири ва вице-канцлери Ларс Клингбайл Силуановнинг бундай тадбирда қабул қилинишини «ташвишли сигнал» деб атаган. У Россия молия вазири иштирок этган тақдирда G20 вакилларининг анъанавий умумий суратига тушишдан бош тортишини ҳам билдирган.
Клингбайлнинг айтишича, Россия билан очиқ мулоқот қилиш, уруш юзасидан танқидий фикрларни билдириш мумкин, аммо ҳозирги шароитда Силуанов билан биргаликда умумий суратга тушиш у учун «ҳаддан ташқари катта қадам» бўлар эди.
Германия вазирига Европанинг бошқа мамлакатлари вакиллари ҳам қўшилган ва якунда умумий сурат Россия молия вазирисиз олинган.
Клингбайл, шунингдек, G20 иштирокчиларининг эрталабки умумий йиғилишида Силуановга Украинадаги урушни тугатиш зарурлигини айтганини ва Берлиннинг Киевни қўллаб-қувватлашини яна бир бор тасдиқлаганини маълум қилди.
Россия Молия вазирлиги эса 31 август куни Бессент ва Силуанов ўртасидаги учрашув бўйича қисқа баёнот берган. Унда томонлар Россия-АҚШ молиявий ҳамкорлиги ҳамда G20 доирасидаги ўзаро алоқаларни муҳокама қилгани айтилган.
Россия томони баёнотида санкциялар ёки Украинадаги уруш билан боғлиқ шартлар ҳақида маълумот келтирилмаган.
Айни пайтда CNBC АҚШ Молия вазирлиги маълумотларига таяниб, Бессент ва Силуанов Ашвиллда АҚШ президенти Доналд Трампнинг Украина бўйича «тинчлик режаси»ни ҳам муҳокама қилганини хабар қилди.
