Скотт Бессент ва Антон Силуанов АҚШнинг Ашвилл шаҳрида 31 август — 1 сентябр кунлари ўтаётган G20 мамлакатлари молия вазирлари ва марказий банклар раҳбарлари учрашуви доирасида музокара ўтказди.
CNBC АҚШ Молия вазирлигига таяниб хабар беришича, Бессент Силуанов билан Доналд Трампнинг Украина бўйича «тинчлик режаси»ни муҳокама қилган. Ушбу маълумотни AFP агентлигига америкалик расмий ҳам тасдиқлаган.
Fox Business мухбири Эдвард Лоуренснинг маълум қилишича, гап АҚШ томонидан 2025 йил ноябрида таклиф қилинган 28 банддан иборат режа ҳақида кетмоқда.
NBC мухбири Жулия Циркин эса Бессент ва Силуанов иқтисодий ҳамкорлик масалаларини ҳам муҳокама қилганини хабар қилди.
Россия Молия вазирлиги учрашув ҳақидаги баёнотида Трампнинг «тинчлик режаси»ни тилга олмаган. Вазирликка кўра, томонлар Россия—АҚШ муносабатларининг молиявий йўналиши ҳамда G20 доирасидаги ҳамкорлик масалаларини муҳокама қилган.
Силуановнинг G20 учрашувида шахсан иштирок этиши Европа вакилларининг норозилигига сабаб бўлди. The New York Times маълумотига кўра, бу Украинадаги уруш бошланганидан буён Россия молия вазирининг бундай учрашувдаги илк шахсий иштироки бўлди. Аввалги тадбирларда Россия номидан бошқа расмийлар қатнашиб келган.
Германия молия вазири ва вице-канцлер Ларс Клингбайл Силуановнинг бундай тадбирда қабул қилинишини «ташвишли сигнал» деб атади.
Клингбайл, агар Силуанов G20 молия вазирларининг анъанавий умумий суратида иштирок этса, суратга тушишни бойкот қилишини билдирган. Унинг позициясини Европанинг бошқа давлатлари вакиллари ҳам қўллаб-қувватлаган.
Натижада G20 иштирокчиларининг умумий сурати Антон Силуановсиз олинган.
Клингбайл, шунингдек, иштирокчиларнинг умумий учрашувида Силуановга Украинадаги урушни тугатиш зарурлигини айтган ва Германиянинг Киевни қўллаб-қувватлашда давом этишини таъкидлаган.
