БМТнинг Озиқ-овқат ва қишлоқ хўжалиги ташкилоти (ФАО) маълумотлари асосида ҳайдаладиган ерлар майдони энг катта бўлган давлатлар рейтинги тузилди.
Унга кўра, Ҳиндистон қарийб 154 млн гектар кўрсаткич билан биринчи ўринни эгаллаган. АҚШда ҳайдаладиган ерлар майдони тахминан 152 млн гектарни ташкил этиб, мамлакат рейтингда иккинчи бўлган.
Россия 122 млн гектар билан учинчи, Хитой эса 108 млн гектар билан тўртинчи ўринни эгаллаган.
Кейинги ўринларда Бразилия — 55,6 млн гектар, Аргентина — 40,4 млн гектар ва Канада — 38,2 млн гектар кўрсаткич билан қайд этилган.
Нигерияда ҳайдаладиган ерлар майдони 36,9 млн гектарни ташкил этади. Украинада бу кўрсаткич 32,9 млн гектар, Австралияда эса қарийб 31 млн гектарга тенг.
Рейтингнинг кучли ўн бешталигига Покистон, Қозоғистон, Судан, Мексика ва Индонезия ҳам кирган. Уларда ҳайдаладиган ерлар майдони Покистондаги қарийб 30 млн гектардан Индонезиядаги 17,8 млн гектаргача бўлган оралиқни ташкил этади.
ФАО таърифига кўра, ҳайдаладиган ерлар қаторига вақтинчалик қишлоқ хўжалиги экинлари етиштириладиган майдонлар, вақтинчалик ўтлоқ ва яйловлар, шунингдек, вақтинча шудгор ҳолатида қолдирилган ерлар киради.
Кўп йиллик экинлар етиштириладиган майдонлар ва доимий яйловлар эса ушбу кўрсаткичга киритилмайди.
