Қашқадарё йил охиригача камбағаллик ва ишсизликдан холи ҳудудга айлантирилади
|12:262 0137 мин
Қашқадарёда 2026 йил охиригача камбағаллик ва ишсизликни тугатиш учун аниқ ҳисоб-китоблар бор, деди Шавкат Мирзиёев. Йиғилишда “Султонтекс” кластери раҳбари Нурбек Эргашев ва лимончилик мактабини яратган Абдуманноп Худойбердиевга давлат мукофотлари берилди. “Мутолаа” лойиҳаси бош муҳаррири Жавлон Жовлиев ва “Ёш китобхон оила” танловининг икки ғолибига Тошкентдан янги хонадонлар совға қилинди.
Фото: Президент матбуот хизматиФото: Президент матбуот хизмати
Президент Шавкат Мирзиёев Қашқадарёга ташрифида вилоятни ижтимоий-иқтисодий ривожлантириш бўйича йиғилиш ўтказмоқда.
Давлат раҳбари йиғилиш иштирокчиларини Ўзбек тили байрами билан табриклаб,Қашқадарё фарзанди, Ўзбекистон Қаҳрамони ва давлат мадҳиямиз муаллифи Абдулла Ориповни ёдга олди.
Бир неча йил аввал энг мураккаб вазиятдаги ҳудудлардан бири бўлган Қашқадарёни йил якунига қадар камбағаллик ва ишсизликдан холи ҳудудга айлантириш мақсад қилинган. Шавкат Мирзиёев бу натижага эришиш учун аниқ ҳисоб-китоблар мавжудлигини қайд этди.
“Кеча вилоятнинг шаҳар ва туманларида, маҳаллаларида бўлган ўзгаришларни кўриб, тадбиркор, инвестор, ёшларнинг кўзларидаги шижоатни кўриб, жуда катта куч олдим”,– деди президент.
Давлат раҳбари “Султонтекс” кластери раҳбари Нурбек Эргашевнинг энергия ва сувни тежайдиган замонавий корхонаси фаолияти билан танишганини айтди. Тадбиркорнинг 2028 йилгача яна 30 минг кишини иш билан таъминлаш, айниқса, аёллар учун кўпроқ имконият яратиш режалари қўллаб-қувватланди.
Шавкат Мирзиёев Нурбек Эргашевга “Ўзбекистонда хизмат кўрсатган тадбиркор” фахрий унвонини бериш тўғрисидаги фармонга имзо қўйганини билдирди.
Қамаши туманидаги Чим маҳалласида сулолавий лимончилик мактабини яратиб, аҳоли даромадини оширишга ҳисса қўшаётган Абдуманноп Худойбердиевга ҳам “Ўзбекистонда хизмат кўрсатган қишлоқ хўжалиги ходими” унвони берилади.
Қашқадарёда маърифатни тарғиб этаётган “Мутолаа” лойиҳасининг бош муҳаррири Жавлон Жовлиевнинг меҳнати ҳам эътироф этилди. Унга, шунингдек, “Ёш китобхон оила” республика танлови ғолиблари Бахтишод Рашидов ва Эъзоза Хушвақтовага Тошкент шаҳридан икки хонали янги хонадонлар совға қилиниши айтилди.
Мавзуга оид
Давлат раҳбари мазкур мукофотларни шу ернинг ўзида топширишни таклиф этди.
Иқтисодий ўсиш
Қашқадарёда йилнинг тўққиз ойида саноат 8,4 фоиз, хизматлар 16,6 фоиз, қишлоқ хўжалиги 4,9 фоизга ўсди. Шу билан бирга, президент ҳозирги натижалар билан вилоятнинг мавжуд салоҳияти ўртасида ҳали катта фарқборлигини кўрсатиб ўтди.
Аҳоли жон бошига саноат маҳсулотлари бўйича вилоят республикада еттинчи, хизматлар бўйичатўққизинчи, қишлоқ хўжалиги ва қурилиш ҳажми бўйича ўн биринчи ўринда. Шавкат Мирзиёев туман ҳокимлари ва банклар“билимга – рағбат, меҳнатга – имконият, ташаббусга – мадад” берадиган муҳит яратса, Қашқадарё бир-икки йилда энг илғор ҳудудлар қаторига чиқиши мумкинлигини таъкидлади.
Саноат
Саноатда янги босқичга ўтиш учун вилоятда етарли ресурс бор. Газ, электр ва ер ости бойликларини даромадли иш ўринлари ҳамда юқори қўшилган қийматга айлантириш вазифаси қўйилди.
GTL заводида қиймати 300 миллион доллар бўлган учта йирик лойиҳа тайёр. Заводдан олинадиган 430 минг тонна нафта асосида янги полимерлар ва нефт-кимёмаҳсулотлари ишлаб чиқариш бўйича 1,5 миллиард долларлик лойиҳани амалга ошириш мумкин.
Деҳқонобод калий заводи қувватини 365 минг тоннадан 600 минг тоннага етказиш имконияти, кичик тоннажли кимё йўналишида эса 830 миллион долларлик 30 дан ортиқ лойиҳавий таклиф бор.
Вилоятга тайинланган лойиҳа менежери ва бошқа масъулларга 20 миллиард долларлик лойиҳалар ва 50 минг иш ўрниниқамраб оладиган учйиллик дастуртайёрлаш топширилди.
Қашқадарё саноатида йирик корхоналар атрофида кооперация занжирларинишакллантиришга алоҳида эътибор қаратилади. Йил якунигачаҒузор, Шўртан, Муборак, Деҳқонобод ва Нишонда олтита саноат кластери ташкил этиш, Шўртан, Муборак, Яккабоғ ва Косонда “Қашқадарё” эркин иқтисодий зонаси филиалларини очиш вазифаси қўйилди. Инфратузилма учун дастлаб 250 миллиард сўм йўналтирилади.
Шунингдек, Хитойнинг FM World корхонасида йиғилаётган замонавий трактор ва қишлоқ хўжалиги техникаларини маҳаллийлаштириш, мазкур корхонада агродронлар ишлаб чиқариш лойиҳаларини бошлаш белгиланди.
Энергетика
Президент ўтган ҳафта энергетика соҳасидаги йирик инвесторларнинг ташаббусларини бирма-бир эшитганини қайд этди. Masdarкомпаниясикеласи йилҚашқадарёда 300 мегаваттли қуёш электр станциясива 75 мегаваттли энергия сақлаш қувватиниишга туширади. Ушбу лойиҳа қиймати 250 миллион доллар.
Қарши туманида хитойлик ҳамкор иштирокида чиқиндидан электр энергияси олиш бўйича 45 мегаваттли лойиҳа якунланмоқда. Электр тармоқларини мустаҳкамлаш учун Нишон ва Кўкдалада иккита йирик подстанция қурилишига 70 миллион доллар жалб қилинади. Уларни келаси йил ишга тушириш вазифаси қўйилди.
Толимаржон – Сўғдиёна йўналишидаги 245 километр янги электр тармоғига 150 миллион доллар ажратилган. Мутасаддиларга ушбу лойиҳани келаси йил якунлаш топширилди.
Қишлоқ хўжалиги
Қашқадарё қишлоқ хўжалигининг ўзида қўшимча 200 минг кишини даромадли қилиш имконияти бор. Шу мақсадда Жаҳон банки билан Миср тажрибаси асосида саккизта тумандаги 100 минг гектар яйловга дронлар ёрдамида қурғоқчилик ва шўрга чидамли чорва озуқаси экиш бошланади.
Бу ишлар Нишон, Ғузор, Муборак, Кўкдала, Косон, Миришкор, Қамаши ва Деҳқонободда олиб борилади. Мазкур туманларда 10 минг бошдан йирик ва 50 минг бошдан майда шохли чорва комплексларини ташкил этиш вазифаси қўйилди. Импорт қилинган чорвани аҳолига сотишда қўшилган қиймат солиғининг нол ставкаси қўлланади.
Ғузор туманида 10 минг гектар ер фойдаланишга киритилади. Ернинг ярмида пахта, қолган қисмида озуқа экинлари етиштирилади. Ерлар деҳқонларга берилиб, кластер тизими йўлга қўйилади.
Ерларни хўжалик айланмасига киритиш учун бир ҳафтада имтиёзлар пакетини ишлаб чиқиш топширилди.
Космик маълумотлар асосида Қашқадарёда фойдаланишга киритиш мумкин бўлган яна 30 минг гектар ер аниқланди. Унинг энг катта қисми Муборак, Косон ва Кўкдалага тўғри келади. Нишон, Қамаши, Қарши, Миришкор, Ғузор, Яккабоғ, Китоб, Чироқчи ва Шаҳрисабзда ҳам қўшимча майдонлар ўзлаштирилади. Бу ишга Мисрдан ўн нафар доимий маслаҳатчи жалб этилади.
Президентимиз Қашқадарёда экин майдонларига сув етказиш мураккаб ва қимматга тушаётганига эътибор қаратди.
Келаси йил 265 километр канал бетонлаштирилади, 20 та насос янгиланади. Бу ишларга 550 миллиард сўм ажратилади. 2027-йилда фермерлар билан бирга 75 минг гектарда сув тежовчи технологиялар жорий этилади.
Бу йил Косон, Нишон, Қамаши ва Миришкорда сиғими 50 минг куб метрдан бўлган тўртта кичик сув ҳовузи қурилди. Мазкур тажриба кенгайтирилиб, 1-июнгача Косон, Нишон, Миришкор, Қамаши ва Яккабоғнинг ҳар бирида яна иккитадан шундай ҳовуз барпо қилинади.
