Бир ойлик ҳарбий хизмат нархи ва шартлари қандай?

Маҳалладаги ёшлар етакчисига учранг. Ёшлар етакчиси уч иш куни ичида тавсиянома тайёрлаб, my.gov.uz порталидаги шахсий кабинетингизга юборади.

Тавсияномани мудофаа ишлари бўлимига кўрсатинг. Шунда сиз 9,52 миллион сўм тўламайсиз.

Бир ойлик ҳарбий хизматга бориш тартиби қандай?

Бир ойлик ҳарбий хизматга бориш учун фуқаро бир неча босқичдан ўтиши керак:

1. Ҳарбий хизмат бўлимига бориш: Чақирув қоғози ёки my.gov.uz орқали ҳарбий хизмат бўлимига келиш ҳақида хабар берилгач, чақирув қоғозида кўрсатилган вақтда Мудофаа ишлари бўлимга боринг. У ерда фуқарога хизматнинг шартлари тушунтирилади ва шартнома тузиш таклиф қилинади.

2. Тиббий кўрикдан ўтиш: Шартнома расмийлаштирилгач, ҳарбий хизматга яроқлиликни аниқлаш учун тиббий кўрикдан ўтасиз.

3. Тўлов қилиш: Пулни шартномада кўрсатилган ҳисобрақамига Халқ банки орқали тўлайсиз. Шунингдек, бўлимдаги QR-кодни телефон камераси орқали сканерлаб, банк иловасида тўлов қилиш мумкин.

Тўловни бирйўла ёки босқичма-босқич 3–12 ойда бўлиб тўлаш мумкин. Пул хизматга олинганидан кейин бир йил мобайнида тўланиши керак. Тўлов чекини Мудофаа ишлари бўлимига олиб боринг.

1. Хизмат вақтини белгилаш: Ҳарбий хизмат бўлими хизматни бошлаш санаси ҳақида хабар беради. Талабалар эса хизматни ўқишга халақит бермайдиган даврда, масалан, таътил вақтида ёки ўқишни тугатгач ўташи мумкин.

Хизматга боришдан олдин тўлов миқдори, уни тўлаш муддати ва хизматни бошлаш санасини аниқлаштириб олиш керак. Бунинг учун яшаш жойидаги мудофаа ишлари бўлимига мурожаат қилиш мумкин.

Тиббий кўрик қаерда ўтказилади?

Тиббий кўрик Мудофаа ишлари бўлимида ўтказилади. Чақирув қоғозида қабул вақти ва ўзингиз билан олиб келишингиз керак бўлган ҳужжатлар рўйхати кўрсатилади. Амбулатор карта, поликлиникадан кўчирмалар, маълумотномалар ва текширув натижалари, диспансерлардан маълумотлар талаб қилинади. Уларни туман соғлиқни сақлаш бўлимидан ёки my.gov.uzʼдан юклаб олиш мумкин.

Қандай шифокорлардан ўтиш керак?

Чақирилувчи терапевт, жарроҳ, стоматолог, офталмолог, ЛОР, дерматовенеролог, психиатр ва невропатолог томонидан текширилади. Керак бўлганда қўшимча таҳлиллар ва текширувларга юборилиши мумкин.

Бир ойлик хизматнинг муддатли хизматдан фарқи нимада?

Муддатли ҳарбий хизмат ва сафарбарлик чақируви резервидаги хизмат давомийлиги, тўлови ҳамда ўташ тартиби билан фарқ қилади. Уларнинг асосий жиҳатлари қуйидаги жадвалда келтирилган.

Бир ойлик хизматни ўтаган фуқаро белгиланган бадални тўлаб, ҳарбий йиғинни тўлиқ тугатган бўлса, муддатли ҳарбий хизматга чақирилишдан озод қилинади.

Бир йиллик ёки бир ойлик ҳарбий хизмат ўтаганликдан қатъи назар бир хил ҳарбий гувоҳнома топширилади.

Ҳарбий гувоҳномада қуйидагилар кўрсатилади:

Биринчи бетида фуқаронинг шахсига оид маълумотлар бўлади. Кейин кетма-кетликда ҳарбий хизматни ўтагани ёки ўтамагани, ҳарбий унвони ва ҳарбий ҳисоб мутахассислиги кўрсатилади.

Шунингдек, резерв ёки захирадаги мақоми, ҳарбий ҳисобдаги мутахассислиги, ҳарбий ҳисобга қўйилгани ҳақидаги маълумотлар бўлади.

Ҳарбий гувоҳнома хизмат тугаган кундан бошлаб 3 кун ўтиб берилади.

Хизмат вақтида иш жойи сақланадими?

Ҳа, қонунга кўра бир ойлик ҳарбий хизмат даврида иш жойи ва лавозими сақланади.

Агар фуқаро йиғин вақтида касал бўлиб қолса ва йиғин тугаганидан кейин ҳам тузалмаса, унинг иш жойи сақланади. Ҳарбий хизмат тугаганидан кейинги даврда касаллик варақаси бўйича пул тўланади.

Тўланган пул қайтариладими?

Йўқ, лекин бу бўйича қонунда айрим истиснолар мавжуд. Масалан, фуқаро ҳарбий хизматга яроқсиз деб топилиб, 27 ёшгача унга I, II ёки III гуруҳ ногиронлиги берилса, тўланган маблағ қайтарилади. Фуқаро вафот этса, тўланган бадални яқин қариндоши, меросхўри, васийси ёки ҳомийсига қайтариш назарда тутилган.

Ортиқча ёки хато ўтказилган тўловлар қайтарилади.

Ҳарбий хизматни ўташ учун тўланган пуллар нимага сарфланади?

Ҳарбий хизмат учун тўланадиган бадал пуллари Вазирлар Маҳкамаси қарорига асосан қуйидаги мақсадлар учун фойдаланилади:

1. Сафарбарлик чақируви резерви йиғинлари харажатлари;

2. Муддатли ҳарбий хизматни тугатганларга нафақа тўлови;

3. Йиғинлар бошқарувини таъминлаш;

4. Мудофаа вазирлиги биноларини таъмирлаш ва қурилиш ишлари;

5. Қурол-яроғ ва техника харидлари.

Ҳар бир идора учун харажатлар режасини унинг раҳбари тасдиқлайди. Режа Мудофаа вазирлигида белгиланган тартибда рўйхатдан ўтказилади.

Кимлар хизматдан озод этилади ва бормаса нима бўлади?

Агар фуқаро бир ойлик ҳарбий хизматга боришни узрли сабабларсиз рад этса, дастлаб Маъмурий жавобгарлик тўғрисидаги кодекснинг 237-моддасига кўра, 5 БҲМгача жарима миқдори қўлланади. Жарима вақтида тўланмаса, мажбурий ижро бюроси томонидан ундирилади.

Кимлар ҳарбий хизматдан озод этилади?

Ҳарбий хизматга яроқсиз деб топилган фуқаро my.gov.uz орқали ҳарбий хизматдан озод этилгани ҳақида маълумотнома олиши мумкин.

Тинчлик даврида қуйидаги шахслар муддатли ҳарбий хизматга ҳамда бир ойлик хизматга чақирилишдан озод этилади:

1. Соғлиғига кўра ҳарбий хизматга яроқсиз деб топилганлар. Бу ҳолат тиббий кўрик натижалари асосида белгиланади; Касалликлар ва уларнинг оғирлик даражалари бўйича талаблар ҳарбий-тиббий кўрик тўғрисидаги низомда белгиланган.

2. Ака-укаси ёки опа-синглиси ҳарбий хизматни ўташ вақтида ҳалок бўлган ёки вафот этганлар. Улар ўз розилиги билан ҳарбий хизматга чақирилиши мумкин.

3. Рўйхатдан ўтган диний ташкилотлардан бирида диний унвонга эга бўлганлар.

Шунингдек, жиноий жавобгарликка тортилган, судланганлик ҳолати ҳали тугамаган фуқаролар ҳам ҳарбий хизматга чақирилмайди.

Нимани эслаб қолиш керак?

1. Фуқаро хизматга чақирув комиссияси қарори асосида олинади, Мудофаа вазирлиги билан шартнома тузади, белгиланган пул бадалини тўлайди ва хизмат даврида бир марта бир ойлик ҳарбий йиғинда қатнашади.

2. Бадал тўлиқ тўланган бўлса, ҳарбий гувоҳнома хизмат тугаган кундан бошлаб 3 кун ўтиб берилади.

3. Гувоҳнома тегишли белги билан берилади.

4. Хизматни ўтаган фуқаро муддатли ҳарбий хизматга чақирилишдан озод қилинади.